Xorazm viloyati Urganch shahri “qizil” hududga aylangani sababli shaharda karantin choralari kuchaytirildi. Bu haqda Xorazm viloyati hokimligi ma’lum qildi.
Xabar berilishicha, Urganch shahrida quyidagi faoliyat turlari vaqtincha taqiqlangan:
- avtomashinalarni yuvish shoxobchalari;
- avtomobillar, qishloq xo‘jaligi va qurilish texnikalariga texnik xizmat ko‘rsatuvchi tashkilotlar;
- hunarmandchilik, maishiy jihozlar va elektron qurilmalarni ta’mirlash ustaxonalari;
- park va istirohat bog‘lari;
- nooziq-ovqat mahsulotlari chakana savdosi;
- zargarlik va gul sotish do‘konlari;
- yo‘nalishsiz taksida yo‘lovchi tashish (yetkazib berish xizmati bundan mustasno);
- jamoat transporti harakati;
- barcha turdagi ommaviy tadbirlar (konsert, teatr, kinoteatr, muzey, sport tadbirlari, masjidlar), oilaviy tantana, ma’raka va marosimlari (dafn marosimlari, 10-15 kishidan ko‘p bo‘lmagan hollar bundan mustasno);
- buyum bozorlari;
- savdo majmualari;
- sartaroshxona va go‘zallik salonlari;
- sport zallari va fitnes klublar, spa va massaj salonlari;
- tungi klub va diskotekalar;
- karaoke va bilyard zallari, chilim (kalyan) markazlari, kompyuter o‘yinlari;
- umumiy ovqatlanish korxonlari (restoran, kafe, oshxona, choyxona) faoliyati (yetkazib berish uchun tayyorlash bundan mustasno);
- yaxna ichimlik savdo nuqtalari;
- ta’lim tashkilotlari, (bog‘cha, maktab, litsey, kollej, texnikum, institut, universitet va boshqalar) o‘quv kurslari;
- mehmonxonalar, shuningdek, xostellar va mehmon uylari;
- davlat organlari va tashkilotlarida jismoniy shaxslar va yuridik shaxslar qabuli.
Urganch shahri ko‘chalari va savdo shoxobchalarida Sanitariya-epidemiologiya osoyishtalik markazining maxsus ishchi guruhlari tomonidan dezinfeksiya ishlari olib borilmoqda.
Eslatib o‘tamiz, 26-may kuni koronavirusdan xoli hududga aylangan Xorazm viloyatida 6-iyun kuni aholi orasida 3 ta kasallanish holati qayd etilib, viloyatga koronavirus qaytdi hamda shahar “qizil” hudud toifasiga o‘tdi.
Izoh (0)