O‘zbekiston Prezidentining 2020-yil 20-maydagi “Har bir oila—tadbirkor” dasturini moliyalashtirishga doir qo‘shimcha chora-tadbirlar to‘g‘risida”gi qaroriga asosan oilaviy tadbirkorlikni rivojlantirish va aholi bandligini ta’minlash maqsadida “Agrobank”, “Mikrokreditbank” va Xalq bankiga O‘zbekiston Tiklanish va taraqqiyot jamg‘armasi tomonidan ajratilishi ko‘zda tutilgan 1 trillion so‘mning 500 milliard so‘mi ajratildi hamda mazkur banklarning joylardagi filiallariga yetkazildi. Bu haqda Markaziy bank tomonidan ma’lum qilindi.
Markaziy bank tomonidan xabar berilishicha, mablag‘larni o‘zlashtirish darajasidan kelib chiqqan holda jamg‘arma hisobidan oilaviy tadbirkorlikni rivojlantirish davlat dasturlari doirasida yana 500 milliard so‘m ajratilishi belgilangan.
Mavzuga doir: Shavkat Mirziyoyev Markaziy bankka kreditlash shartlarini soddalashtirish bo‘yicha topshiriq berdi
Mexanizmga ko‘ra, mahsulotlarni yetkazib beruvchi (xizmatlar ko‘rsatuvchi) ta’minotchilar ro‘yxatini tasdiqlash amaliyoti bekor qilindi va faqat naslli chorva mollari (qoramol, qo‘y, echki) yetkazib beruvchilar ro‘yxati ularning yetarlicha imkoniyatlari mavjudligi inobatga olingan holda tasdiqlanadi.
Tuman sektori rahbarlari o‘zlariga biriktirilgan hududlarda kredit olish istagini bildirgan shaxslarning tadbirkorlik tashabbuslarini o‘rganib, ularni moliyalashtirish uchun tavsiyanoma beradi.
Bazaviy hisoblash miqdorining 1000 barobarigacha kredit ajratishga viloyat markazlari tomonidan xulosa berilishi talab etilmagan holda, tuman (shahar) markazlarining xulosalari qabul qilinadi hamda ushbu xulosalar tuman (shahar) hokimlarining birinchi o‘rinbosari va tegishli bank filiali boshqaruvchisi tomonidan belgilangan tartibda ma’qullanishi yetarli hisoblanadi.
Kredit mablag‘lari qarz oluvchilar tomonidan erkin tarzda tuzilgan shartnomalarga asosan mahsulot va uskuna yetkazib beruvchi (xizmat ko‘rsatuvchi)ning hisob raqamiga o‘tkazib beriladi.
Qayd etilishicha, oilaviy tadbirkorlikni rivojlantirish davlat dasturlari doirasida kreditlar ajratishda tuman markazlari tomonidan xulosalar hudud uchun belgilangan resurs mablag‘lari doirasida beriladi. Dastur doirasida ajratiladigan mablag‘larning 70 foizi kafolatlangan yangi ish o‘rinlari yaratishni ko‘zda tutuvchi kichik va o‘rta biznes loyihalariga, 30 foizi ustuvor ravishda uy sharoitida o‘zini o‘zi band qilish, xususan, aholining tomorqasidan unumli foydalanish hamda uy sharoitida hunarmandchilikni rivojlantirishga yo‘naltirish mo‘ljallanmoqda.
Kreditlar hududlarni ijtimoiy-iqtisodiy rivojlantirishda va kambag‘allikni qisqartirishda hissasi yuqori bo‘lgan (ustuvor ravishda ijtimoiy himoyaga muhtoj va ishsiz fuqarolarni daromadli mehnat hamda yangi ish o‘rinlari bilan band qilishga qaratilgan) loyihalarni moliyalashtirish uchun yo‘naltirilishiga hamda ajratilgan kreditlarning maqsadli ishlatilishi va samaradorligi ta’minlanishiga alohida e’tibor qaratiladi.
Avvalroq O‘zbekistonda o‘zini o‘zi band qilgan shaxslar shug‘ullanishi mumkin bo‘lgan faoliyat turlari ko‘paygani haqida xabar berilgandi.
Izoh (0)