Qashqadaryo viloyati Chiroqchi tumanida koronavirus bilan kasallanish bo‘yicha yangi holatlar qayd etilgani sababli tuman transport vositalari uchun yopildi, bir qator cheklovlar qayta joriy qilindi. Bu haqda Chiroqchi tumani hokimligi tomonidan ma’lum qilindi.
Ma’lum qilinishicha, 9-iyundan boshlab Chiroqchiga kirish-chiqish yo‘llari yopilib, tumanda barcha turdagi jamoat transportlari harakati vaqtinchalik cheklandi. Tuman va IIB boshlig‘i jamoat transporti va yo‘nalishsiz taksilar harakati karantin davrida vaqtincha to‘xtatilishi xususida haydovchilarga tushunchalar bergan.
Statsionar postlarda mahalliy davlat hokimiyati organlari, huquq-tartibot idoralari, korxona, tashkilotlarda ishlovchi xodimlarning avtotransport vositalari majburiy ravishda dezinfeksiya qilinadi.
Tumanga kirish va chiqishdagi cheklovlar yuk tashish bilan bog‘liq hollarga, doimiy yashovchi (ro‘yxatdan o‘tgan) shaxslarga, mahalliy davlat hokimiyati organlariga, huquq-tartibot idoralari, shifokor va hamshiralar, sanitariya-epidemiologik osoyishtalik markazi xodimlariga nisbatan tatbiq etilmaydi.
Tuman hokimligi tomonidan ma’lum qilinishicha, Chiroqchi tumani “qizil” toifadagi hududlar qatoriga kiritilgani sababli tumanda qator karantin cheklovlari qayta tiklandi.
Chiroqchida quyidagi faoliyat turlariga cheklovlar qayta kuchga kiradi:
- tuman hududiga kirib chiqish nazorat postlarini joriy qilish;
- avtomashinalar yuvish shoxobchalari faoliyati, avtomobillar va texnikalariga texnik xizmat ko‘rsatuvchi tashkilotlar;
- hunarmandchilik, maishiy jihozlar va elektron qurilmalarni ta’mirlash ustaxonalari;
- park va istirohat bog‘lari;
- nooziq-ovqat mahsulotlari chakana savdosi, zargarlik va gul sotish do‘konlari;
- yo‘nalishsiz taksida yo‘lovchi tashish;
- jamoat transporti harakati;
- barcha turdagi ommaviy tadbirlar (konsert, teatr, kinoteatr, muzey, sport tadbirlari), oilaviy tantana, ma’raka va marosimlari (dafn marosimlari, 10-15 kishidan ko‘p bo‘lmagan hollar bundan mustasno);
- buyum bozorlari;
- savdo majmualari;
- sartaroshxona va go‘zallik salonlari;
- poyabzal ta’mirlash nuqtalari va ustaxonalari;
- sport zallari va fitnes klublar;
- tungi klub va diskotekalar;
- karaoke va bilyard zallari, chilim (kalyan) markazlari, kompyuter o‘yinlari faoliyati;
- umumiy ovqatlanish korxonalari (yetkazib berish uchun tayyorlash bundan mustasno);
- yaxna ichimlik savdo nuqtalari (ulgurji tarqatish nuqtalari bundan mustasno);
- ta’lim tashkilotlari (bog‘cha, maktab, kollej va boshqalar) o‘quv kurslari;
- mehmonxonalar, shuningdek, mehmon uylari;
- davlat organlari va tashkilotlarida jismoniy shaxslar va yuridik shaxslar qabuli;
- tumandagi barcha jome masjidlar.
Eslatib o‘tamiz, 1-maydan buyon koronavirusdan xoli hudud bo‘lgan Qashqadaryoga 5-iyun kuni koronavirus qaytdi. Toshkent shahridagi “O‘rikzor” bozorida yuk tashuvchi bo‘lib ishlagan chiroqchilik fuqaro va u bilan yaqin muloqotda bo‘lgan 3 nafar oila a’zosida koronavirus aniqlangan. 2020-yil 6-iyun holati bo‘yicha, Chiroqchi tumani “qizil” hudud bo‘lib turibdi.
Izoh (0)