O‘zbekiston hukumati mamlakatda karantin e’lon qilingan 16-martdan 7-iyunga qadar 108 ta charter reys tashkil etdi va 16 031 nafar fuqaroni xorijdan vatanga qaytardi. Bu haqda O‘zbekiston Tashqi ishlar vazirligi xabar berdi.
Ma’lum qilinishicha, olib kelingan fuqarolarning 10 758 nafari Rossiyadan, 1920 nafari Turkiyadan, 1387 nafari BAAdan O‘zbekistonga qaytganlar hisoblanadi. Bundan tashqari, 40 633 nafar fuqaro O‘zbekiston—Qozog‘iston chegarasi, 4882 kishi O‘zbekiston—Qirg‘iziston chegarasi, 592 kishi esa O‘zbekiston—Tojikiston chegarasini kesib o‘tgan holda vatanga qaygan.
Shuningdek, 18—19-may kunlari Rossiya—Qozog‘iston davlatlararo chegarasidagi “Mashtakovo” nazorat-o‘tkazish punktida to‘plangan 1206 nafar O‘zbekiston fuqarosi Qozog‘iston hududi orqali vatanga qaytarilgan.
Vazirlikning ma’lum qilishicha, 1-iyun holatiga ko‘ra, xorijiy mamlakatlardagi tezkor shtablarga yordam so‘rab murojaat qilgan chet ellardagi fuqarolar soni 104 mingdan ortiqni tashkil etgan.
Vazirlik tomonidan qayd etilishicha, 16-mart kuni xorijiy mamlakatlarda joriy qilingan karantin choralari sababli chet elda bo‘lib turgan O‘zbekiston fuqarolari bilan yuz beradigan qiyinchiliklarni o‘z vaqtida hal qilish hamda vatandoshlar duch keladigan noodatiy holatlarga tezkorlik bilan chora ko‘rish maqsadida Tashqi ishlar vazirligi, elchixonalari va konsullik muassasalarida operativ shtablar tashkil etilgan. Diplomatik vakolatxonalar huzuridagi operativ shtablar 24 soatlik rejimda faoliyat ko‘rsatmoqda va fuqarolar konsullik-huquqiy, moddiy-moliyaviy, siyosiy-diplomatik va boshqa turdagi ko‘mak berish bo‘yicha kompleks choralar ko‘rmoqda.
Diplomatik missiyalar huzuridagi shtablar tomonidan O‘zbekiston fuqarolarining har qanday so‘rovlariga tezkorlik bilan javob qaytarish bo‘yicha faol ishlar amalga oshirilmoqda, jumladan, charter reyslari bilan vatanga qaytishda ko‘mak so‘rab murojaat qilgan fuqarolarning ro‘yxatlari tuzilmoqda, ma’lumot har kuni yangilanib, Respublika maxsus komissiyasiga yo‘llanmoqda.
Eslatib o‘tamiz, 25—31-may kunlari 8 ta charter reys amalga oshirilgan hamda Rossiya va Turkiyadan jami 2118 nafar fuqaro O‘zbekistonga olib kelinishi xabar qilingandi. 13-maydan 24-maygacha xorijdagi o‘zbekistonliklarni olib kelish uchun 12 ta reys amalga oshirildi. Bundan tashqari, 25-maydan 7-iyun kunigacha 17 ta reys orqali xorijdagi fuqarolar evakuatsiya qildi.
Shavkat Mirziyoyev raisligida 26-may kuni bo‘lib o‘tgan yig‘ilishda chet eldan olib kelingan O‘zbekiston fuqarolari soni 47 ming nafarni tashkil etayotgani ma’lum qilingandi. Keyingi 10 kunda esa 3,5 ming odam havo yo‘llari, 7 mingga yaqin vatandosh esa chegara postlari orqali O‘zbekistonga kelishi kutilayotgani bildirilgandi. Shuningdek, 100 mingdan ortiq fuqaro O‘zbekistonga qaytish istagini bildirib, navbat kutayotgani aytilgandi.
Prezidenti Shavkat Mirziyoyev raisligida 3-iyun kuni o‘tkazilgan videoselektorda so‘nggi bir oyda xorijdagi 28 ming nafar o‘zbekistonlik vatanga qaytarilgani ma’lum qilindi. Bundan tashqari, 8—21-iyun kunlar O‘zbekiston xorijdagi fuqarolarni olib kelish uchun yana 20 ta charter reys amalga oshiradi.
Izoh (0)