O‘zbekistonning Rossiyadagi elchixonasi 2020-yil 14-may kuni ishga tushirilgan va qiyin vaziyatga tushib qolgan vatandoshlarga bir martalik moliyaviy yordam to‘lashni ko‘zda tutadigan “Mehr” loyihasi tomonidan 6-iyun holatiga ko‘ra, 2428 nafar O‘zbekiston fuqarosi 14 935 076 rubl (taxminan, 218 ming dollar) miqdorida moliyaviy yordam oldi. Bu haqda O‘zbekiston Tashqi ishlar vazirligi xabar berdi.
Ma’lum qilinishicha, diplomatik vakolatxona 25-martdan 28-maygacha Moskva shahrida o‘ta qiyin vaziyatda qolgan O‘zbekiston fuqarolarining yashash va oziq-ovqati uchun jami 6 700 560 rubl (taxminan, 100 ming dollar) to‘lagan. Shu kabi choralar Rossiyaning boshqa shaharlarida joylashgan bosh konsulxonalar tomonidan ham amalga oshirilmoqda.
Mavzuga doir: Karantin sababli Rossiyadagi 1000 nafardan ortiq o‘zbekistonlik talabaga yordam ko‘rsatildi
TIV tomonidan bildirilishicha, O‘zbekistonning elchixonalari va konsullik muassasalari koronavirusga qarshi kurashda insonparvarlik yordami va texnik ko‘mak jalb qilish uchun maqsadli ishlarni amalga oshirdi.
10-aprel kuni O‘zbekistonning AQShdagi diplomatik vakolatxonalari tashabbusi bilan va diaspora tashkilotlari ko‘magida “Biz O‘zbekistonga befarq emasmiz” nomli xayriya aksiyasi boshlandi. Aksiya doirasida 28-may holatiga ko‘ra, 61 675 dollar miqdoridagi mablag‘ yig‘ilib, “Mehr-shafqat va salomatlik” jamoat fondining maxsus hisob raqamiga o‘tkazildi. Mablag‘ yig‘ish davom etmoqda.
O‘zbekistonning Germaniyadagi elchixonasi ham “Kuch birlikda” xayr-saxovat aksiyasi tashabbusi bilan chiqdi. Yig‘ilgan mablag‘lar hisobidan 705 ta oilaga qariyb 10 ming yevro miqdorida yordam ko‘rsatildi. O‘zbekistonning Janubiy Koreyadagi elchixonasi tomonidan xayriya mablag‘larini yig‘ish bo‘yicha olib borilgan ishlar natijasida 100 ming dollardan ortiq mablag‘ Jamoatchilik fondi hisob raqamiga o‘tkazildi.
O‘zbekistonning Londondagi elchixonasi tomonidan Buyuk Britaniyaning BAT kompaniyasi tomonidan 2 milliard so‘m pul o‘tkazilishi va sun’iy nafas oldirish apparatlarini xarid qilish uchun 200 ming dollar miqdoridagi mablag‘ ajratilishi masalasi hal qilindi. Anqara shahridagi elchixona O‘zbekistonga 50 dona o‘pkani sun’iy nafas oldirish apparatini beg‘araz asosda yetkazib berishni tashkil qildi.
Vazirlik va O‘zbekistonning chet eldagi diplomatik vakolatxonalari harakatlari natijasida “Mehr-shafqat va salomatlik” jamoat fondining hisob raqamiga deyarli 250 ming dollar o‘tkazildi. Shuningdek, chet eldagi diplomatik vakolatxonalar yordamida tibbiy jihozlar olish uchun 400 ming dollardan ko‘proq mablag‘, shaxsiy himoya va gigiyena vositalari, tibbiy asboblar va buyumlar ko‘rinishidagi bir necha yuz tonna insonparvarlik yordami O‘zbekistonga jalb qilindi.
Qayd etilishicha, xorijiy davlatlarning vakolatli organlari bilan birgalikda viza muddatlarini uzaytirish masalalari ishlab chiqilmoqda, yuridik va konsullik xizmatlari ko‘rsatilmoqda, ehtiyojmand fuqarolarga vaqtincha turar joy, oziq-ovqat, dori-darmon, shaxsiy gigiyena vositalari va boshqalar bilan ta’minlashda yordam ko‘rsatilmoqda.
Izoh (0)