Prezident Shavkat Mirziyoyev raisligida 26-may kuni investitsiya masalalari muhokamasiga bag‘ishlangan videoselektor yig‘ilishi bo‘lib o‘tdi. Yig‘ilish avvalida O‘zbekistonda koronavirus pandemiyasiga qarshi kurash borasida amalga oshirilayotgan ishlar haqida alohida to‘xtalib o‘tildi.
Bugungacha chet eldan olib kelingan O‘zbekiston fuqarolari soni 47 ming nafarni tashkil etayotgani ma’lum qilindi. Keyingi 10 kunda esa 3,5 ming odam havo yo‘llari, 7 mingga yaqin vatandosh esa chegara postlari orqali O‘zbekistonga kelishi kutilyapti.
Ayni vaqtda, davlat rahbarining ta’kidlashicha, “ularning, ayniqsa keyingi ikki hafta davomida kirib kelganlarning aksariyatida koronavirus aniqlangan” (umuman, so‘nggi kunlarda O‘zbekistonda aniqlangan kasallanish holatlarining qariyb 50 foizini xorijdan kelgan fuqarolar tashkil etadi).
“Fuqarolarimiz qaytib kelayotgan davlatlar hamda qo‘shni mamlakatlardagi vaziyatning og‘irligini hisobga olib, xotirjamlikka berilish mumkin emas”, — dedi Prezident. Shavkat Mirziyoyevning qayd etishicha, yana 100 ming nafardan ortiq vatandosh O‘zbekistonga qaytish istagini bildirib, navbat kutmoqda.
Mavzuga doir:
- Shavkat Mirziyoyev karantin choralarini kuchaytirishni buyurdi. Toshkent “qizil” hududga aylanishi mumkin
- Shavkat Mirziyoyev: Odamlar karantinning yumshatilganini “kasallik tugadi” deb, noto‘g‘ri qabul qilmoqda
- Shavkat Mirziyoyev “qizil” va “sariq” hududlarda kunlik test olish sonini oshirish haqida ko‘rsatma berdi
Shuningdek, Rossiya—Qozog‘iston chegarasida to‘plangan 1100 nafar vatandosh Prezident topshirig‘iga asosan 18—19-may kunlari avtobuslarda O‘zbekistonga olib ketildi. Keyinchalik xuddi shu chegara zonasida yana yuzlab o‘zbekistonliklar to‘plangani ma’lum bo‘ldi. TIV ulardan vaqtinchalik yashash joylariga qaytishni so‘radi.
Bundan avval O‘zbekiston Tashqi ishlar vazirligi Rossiyada karantin cheklovlari sharoitida bo‘lib turgan 65 mingga yaqin fuqaro vatanga qaytish bo‘yicha onlayn ariza topshirganini ma’lum qilgan edi. Rossiyada og‘ir ahvolda qolgan vatandoshlarga moddiy yordam ko‘rsatish choralari ham ko‘rilmoqda.
22-may kuni Boshqirdistonda 53 nafar o‘zbekistonlik mehnat muhojirida koronavirus infetskiyasi aniqlangani haqida xabarlar tarqalgan edi. O‘zbekiston Tashqi ishlar vazirligi tomonidan 18-aprelda berilgan axborotga ko‘ra, Avstriya, Armaniston, AQSh, BAA, Gretsiya, Isroil, Koreya, Pokiston, Rossiya, Tailand, Turkiya, Yaponiya va Qozog‘istonda bo‘lib turgan 73 nafar O‘zbekiston fuqarosida koronavirus infeksiyasi aniqlangan, ularning kamida to‘rt nafari vafot etgan edi.
Ma’lumot uchun, 26-may soat 17:00 holatiga ko‘ra O‘zbekistonda 3281 ta holatda koronavirus infeksiyasi bilan kasallanish holati aniqlangan, bemorlarning 2627 nafari sog‘aygan, 13 nafar bemor esa kasallik asoratlari oqibatida vafot etgan.
Izoh (0)