Ўзбекистон ҳукумати мамлакатда карантин эълон қилинган 16 мартдан 7 июнга қадар 108 та чартер рейс ташкил этди ва 16 031 нафар фуқарони хориждан ватанга қайтарди. Бу ҳақда Ўзбекистон Ташқи ишлар вазирлиги хабар берди.
Маълум қилинишича, олиб келинган фуқароларнинг 10 758 нафари Россиядан, 1920 нафари Туркиядан, 1387 нафари БААдан Ўзбекистонга қайтганлар ҳисобланади. Бундан ташқари, 40 633 нафар фуқаро Ўзбекистон—Қозоғистон чегараси, 4882 киши Ўзбекистон—Қирғизистон чегараси, 592 киши эса Ўзбекистон—Тожикистон чегарасини кесиб ўтган ҳолда ватанга қайган.
Шунингдек, 18—19 май кунлари Россия—Қозоғистон давлатлараро чегарасидаги «Маштаково» назорат-ўтказиш пунктида тўпланган 1206 нафар Ўзбекистон фуқароси Қозоғистон ҳудуди орқали ватанга қайтарилган.
Вазирликнинг маълум қилишича, 1 июнь ҳолатига кўра, хорижий мамлакатлардаги тезкор штабларга ёрдам сўраб мурожаат қилган чет эллардаги фуқаролар сони 104 мингдан ортиқни ташкил этган.
Вазирлик томонидан қайд этилишича, 16 март куни хорижий мамлакатларда жорий қилинган карантин чоралари сабабли чет элда бўлиб турган Ўзбекистон фуқаролари билан юз берадиган қийинчиликларни ўз вақтида ҳал қилиш ҳамда ватандошлар дуч келадиган ноодатий ҳолатларга тезкорлик билан чора кўриш мақсадида Ташқи ишлар вазирлиги, элчихоналари ва консуллик муассасаларида оператив штаблар ташкил этилган. Дипломатик ваколатхоналар ҳузуридаги оператив штаблар 24 соатлик режимда фаолият кўрсатмоқда ва фуқаролар консуллик-ҳуқуқий, моддий-молиявий, сиёсий-дипломатик ва бошқа турдаги кўмак бериш бўйича комплекс чоралар кўрмоқда.
Дипломатик миссиялар ҳузуридаги штаблар томонидан Ўзбекистон фуқароларининг ҳар қандай сўровларига тезкорлик билан жавоб қайтариш бўйича фаол ишлар амалга оширилмоқда, жумладан, чартер рейслари билан ватанга қайтишда кўмак сўраб мурожаат қилган фуқароларнинг рўйхатлари тузилмоқда, маълумот ҳар куни янгиланиб, Республика махсус комиссиясига йўлланмоқда.
Эслатиб ўтамиз, 25—31 май кунлари 8 та чартер рейс амалга оширилган ҳамда Россия ва Туркиядан жами 2118 нафар фуқаро Ўзбекистонга олиб келиниши хабар қилинганди. 13 майдан 24 майгача хориждаги ўзбекистонликларни олиб келиш учун 12 та рейс амалга оширилди. Бундан ташқари, 25 майдан 7 июнь кунигача 17 та рейс орқали хориждаги фуқаролар эвакуация қилди.
Шавкат Мирзиёев раислигида 26 май куни бўлиб ўтган йиғилишда чет элдан олиб келинган Ўзбекистон фуқаролари сони 47 минг нафарни ташкил этаётгани маълум қилинганди. Кейинги 10 кунда эса 3,5 минг одам ҳаво йўллари, 7 мингга яқин ватандош эса чегара постлари орқали Ўзбекистонга келиши кутилаётгани билдирилганди. Шунингдек, 100 мингдан ортиқ фуқаро Ўзбекистонга қайтиш истагини билдириб, навбат кутаётгани айтилганди.
Президенти Шавкат Мирзиёев раислигида 3 июнь куни ўтказилган видеоселекторда сўнгги бир ойда хориждаги 28 минг нафар ўзбекистонлик ватанга қайтарилгани маълум қилинди. Бундан ташқари, 8—21 июнь кунлар Ўзбекистон хориждаги фуқароларни олиб келиш учун яна 20 та чартер рейс амалга оширади.
Изоҳ (0)