Namangan viloyati To‘raqo‘rg‘on tumanidagi “Sohilobod” mahalla fuqarolar yig‘inida istiqomat qiluvchi nuroniy Muslimxo‘ja Qosimov o‘ziga qarashli binoning to‘rtta xonasini hujjatlarini rasmiylashtirib, mahalla fuqarolar yig‘ini hisobiga o‘tkazib berdi. Bu haqda Mahalla va oilani qo‘llab-quvvatlash vazirligi matbuot xizmati “Daryo”ga ma’lum qildi.
“O‘zim tug‘ilib o‘sgan mahallamga xayr-saxovat ko‘rsatish niyati ko‘p yillardan buyon yuragimda jo‘sh urar edi. Bugun ana shu niyatlarimni yuzaga chiqarganimdan baxtiyorman”, — deydi 70 yoshga yaqinlashgan otaxon. Vazirlik matbuot xizmatining qayd etishicha, bu voqea mahalla faoliyati samaradorligining oshishiga, uning jinoyatdan xoli hududga aylanishiga yordam beradi.
Qo‘shimcha qilinishicha, “Mahalla kompleksi” majmualarini qurilishi yuzasidan 2020—2022-yillarga mo‘ljallangan Dasturga asosan, 2020-yilda Namanganning To‘raqo‘rg‘on tumanida 16 ta mahalla fuqarolar yig‘inlari uchun yangi binolar qurish belgilangan. Bugungi kunda 12 ta hududda mahalla majmualarining qurilishi boshlangan.
Izoh (0)