Kanada bosh vaziri Jastin Tryudo matbuot anjumanida Donald Trampning AQShdagi namoyishlarga bildirayotgan munosabati haqidagi savolga javob berishda uzoq vaqt davomida indamay turdi. Guardian News ushbu holat aks etgan videoni YouTube’dagi kanaliga yuklagan.
“Qo‘shma Shtatlarda sodir bo‘layotgan voqealarni qo‘rqinch va xavotir bilan kuzatib boryapmiz. Odamlarni birlashtirish, ularni tinglash, bir necha o‘n yilliklardan beri vaziyat asta-sekin yaxshilanayotganiga qaramay adolatsizlikning davom etayotganini tan olish vaqti keldi”, – degan Tryudo uzoq davom etgan sukutdan keyin.
Shuningdek, Jastin Tryudo savolga javob bergan vaqtida Trampni eslatishdan o‘zini tiygan va uning ismini aytmagan.
Eslatib o‘tamiz, Minneapolisda 46 yoshli afro-amerikalik Jorj Floydning politsiyachilar tomonidan qiynoqqa solinishi va kasalxonada vafot etishi oqibatida AQShning o‘nlab shaharlarida norozilik namoyishlari o‘tkazila boshlagan.
Avval AQSh prezidenti Donald Tramp namoyishlarni ichki terrorchilik deb atagan, ularni bostirish uchun harbiylarni jalb qilishi haqida ham gapirgandi. Keyinchalik uning Vashington ko‘chalaridagi to‘polonlar vaqtida bunkerga berkingani xabar qilingandi. Poytaxtda vaziyat barqarorlashgan Tramp Twitter’dagi sahifasida o‘ziga o‘zi rahmat aytgan.
Izoh (0)