Tailandda ishlab chiqilgan COVID-19 koronavirus infeksiyasiga qarshi vaksina 2021-yilning to‘rtinchi choragida ommaviy foydalanish uchun tayyor holga kelishi mumkin. Bu haqda Tailand sog‘liqni saqlash vazirligida o‘tkazilgan brifingda mamlakat vaksinatsiya milliy instituti doktori Nakxon Premsi ma’lum qilgan, deb yozmoqda “RIA Novosti”.
“Vaksina 2021-yil IV choragida ommaviy foydalanishga tayyor holatga keltiriladi”, – degan u.
“Vaksinaning hayvonlarda o‘tkazilgan sinovlarida ajoyib natijalar qayd etildi, biroq ommaviy foydalanish uchun sinovlar siklini yakuniga yetkazish lozim, jumladan, ko‘ngillilarda test qilish, keyin esa Tailand aholisining kamida chorak qismini vaksinatsiya qilishga yetadigan, ya’ni 23 million dozani ishlab chiqarish zarur”, – degan institut rahbari.
Shuningdek, u 23-may kuni Chulalongkorn universiteti olimlari mamlakat vaksinatsiya milliy institutining umumiy dasturi doirasida vaksinani maymunlarda test qilish ishlarini boshlab yuborganini ham aytib o‘tgan.
“Mazkur testlar bir oydan bir yarim oygacha vaqt talab etadi va iyul boshida yakuniga yetishi mumkin. Keyin vaksina dozalarining birinchi partiyasi ishlab chiqariladi va ko‘ngillilarda sinovdan o‘tkaziladi. Ishlab chiqarish hatto gap juda kam dozalar haqida ketgan vaqtda ham mehnat talab qiladigan va uzoq davom etadigan jarayon. Test qilish shu yili oktabr yoki noyabrda yakuniga yetadi va shundan keyin ommaviy ishlab chiqarish jarayoni boshlanadi”, – degan Premsi.
Doktor vaksinaning uzoq vaqt davomida tayyorlanishi, hayvonlar va odamlarda test qilinishi yakunda uning samaradorligi hamda odamlarning xavfsizligini ta’minlash uchun zarurligini ta’kidlagan.
Tailand vaksinatsiya milliy institutining rahbari COVID-19 vaksinasini yaratish bo‘yicha dasturi sog‘liqni saqlash hamda oliy ta’lim, ilm-fan va innovatsiyalar vazirliklari bilan hamkorlik doirasida amalga oshirilayotgani, jarayonga xususiy sektor hamda xorijdagi hamkorlarning tadqiqotlarini o‘rgangan holda ishlab chiqilayotganini bildirgan. AQShning Pensilvaniya universiteti testlarni tekshirish va natijalarni tasdiqlash ishlarida ishtirok etmoqda, birinchi partiyani ishlab chiqarishda AQSh va Kanadadagi xususiy kompaniyalar ham qatnashadi, vaksinani ommaviy ishlab chiqarish esa Tailandning BioNet Asia kompaniyasi tomonidan amalga oshiriladi.
“Tadqiqot dasturida Chulalongkorn universiteti olimlaridan tashqari Shahzoda Maxidola nomidagi universitet vakillari, shuningdek, mamlakat vaksinatsiya milliy instituti hamda oliy ta’lim, ilm-fan va innovatsiyalar vazirligining Innovatsion tadqiqotlar va ishlanmalar instituti vakillari ham ishtirok etmoqda”, – degan u.“Tailand – koronavirus infeksiyasiga qarshi vaksina ishlab chiqarayotgan 11 ta davlat orasida hozircha eng uzoqqa bora olgan mamlakatlardan biri. Jarayonda Xitoy, AQSh, Buyuk Britaniya, Germaniya va Avstraliya yetakchilik qilmoqda, ushbu davlatlar odamlarda vaksinani sinashni boshlab yuborgan”, – degan Premsi.
Uning qo‘shimcha qilishicha, 11 ta davlatda koronavirusga qarshi 100 dan ortiq turdagi vaksinalar ishlab chiqilmoqda.
“Ushbu mamlakatlardagi ishlar doimiy ravishda Jahon sog‘liqni saqlash tashkiloti bilan ma’lumot almashinuvi orqali amalga oshirilmoqda. Yakunda eng omadli vaksina ushbu davlatlarda ommaviy tarzda ishlab chiqariladi va boshqa davlatlar ham undan foydalanishi mumkin bo‘ladi.
“Bitta vaksina bilan butun yer yuzi aholisini qamrab olishning imkoni yo‘q, ishlab chiqarishga yillar ketadi, shuning uchun ham vaksinani bir nechta davlatlar bir vaqtning o‘zida ishlab chiqishga harakat qilishi eng to‘g‘ri qaror”, – degan u.
Tailandda ishlab chiqilayotgan vaksina RNK-vaksina hisoblanadi va uning ta’sirida inson organizmi koronavirusga qarshi antitanalar ishlab chiqaradi.
Izoh (0)