Таиландда ишлаб чиқилган COVID-19 коронавирус инфекциясига қарши вакцина 2021 йилнинг тўртинчи чорагида оммавий фойдаланиш учун тайёр ҳолга келиши мумкин. Бу ҳақда Таиланд соғлиқни сақлаш вазирлигида ўтказилган брифингда мамлакат вакцинация миллий институти доктори Накхон Премси маълум қилган, деб ёзмоқда «РИА Новости».
«Вакцина 2021 йил IV чорагида оммавий фойдаланишга тайёр ҳолатга келтирилади», – деган у.
«Вакцинанинг ҳайвонларда ўтказилган синовларида ажойиб натижалар қайд этилди, бироқ оммавий фойдаланиш учун синовлар циклини якунига етказиш лозим, жумладан, кўнгиллиларда тест қилиш, кейин эса Таиланд аҳолисининг камида чорак қисмини вакцинация қилишга етадиган, яъни 23 миллион дозани ишлаб чиқариш зарур», – деган институт раҳбари.
Шунингдек, у 23 май куни Чулалонгкорн университети олимлари мамлакат вакцинация миллий институтининг умумий дастури доирасида вакцинани маймунларда тест қилиш ишларини бошлаб юборганини ҳам айтиб ўтган.
«Мазкур тестлар бир ойдан бир ярим ойгача вақт талаб этади ва июль бошида якунига етиши мумкин. Кейин вакцина дозаларининг биринчи партияси ишлаб чиқарилади ва кўнгиллиларда синовдан ўтказилади. Ишлаб чиқариш ҳатто гап жуда кам дозалар ҳақида кетган вақтда ҳам меҳнат талаб қиладиган ва узоқ давом этадиган жараён. Тест қилиш шу йили октябрь ёки ноябрда якунига етади ва шундан кейин оммавий ишлаб чиқариш жараёни бошланади», – деган Премси.
Доктор вакцинанинг узоқ вақт давомида тайёрланиши, ҳайвонлар ва одамларда тест қилиниши якунда унинг самарадорлиги ҳамда одамларнинг хавфсизлигини таъминлаш учун зарурлигини таъкидлаган.
Таиланд вакцинация миллий институтининг раҳбари COVID-19 вакцинасини яратиш бўйича дастури соғлиқни сақлаш ҳамда олий таълим, илм-фан ва инновациялар вазирликлари билан ҳамкорлик доирасида амалга оширилаётгани, жараёнга хусусий сектор ҳамда хориждаги ҳамкорларнинг тадқиқотларини ўрганган ҳолда ишлаб чиқилаётганини билдирган. АҚШнинг Пенсильвания университети тестларни текшириш ва натижаларни тасдиқлаш ишларида иштирок этмоқда, биринчи партияни ишлаб чиқаришда АҚШ ва Канададаги хусусий компаниялар ҳам қатнашади, вакцинани оммавий ишлаб чиқариш эса Таиланднинг BioNet Asia компанияси томонидан амалга оширилади.
«Тадқиқот дастурида Чулалонгкорн университети олимларидан ташқари Шаҳзода Махидола номидаги университет вакиллари, шунингдек, мамлакат вакцинация миллий институти ҳамда олий таълим, илм-фан ва инновациялар вазирлигининг Инновацион тадқиқотлар ва ишланмалар институти вакиллари ҳам иштирок этмоқда», – деган у.«Таиланд – коронавирус инфекциясига қарши вакцина ишлаб чиқараётган 11 та давлат орасида ҳозирча энг узоққа бора олган мамлакатлардан бири. Жараёнда Хитой, АҚШ, Буюк Британия, Германия ва Австралия етакчилик қилмоқда, ушбу давлатлар одамларда вакцинани синашни бошлаб юборган», – деган Премси.
Унинг қўшимча қилишича, 11 та давлатда коронавирусга қарши 100 дан ортиқ турдаги вакциналар ишлаб чиқилмоқда.
«Ушбу мамлакатлардаги ишлар доимий равишда Жаҳон соғлиқни сақлаш ташкилоти билан маълумот алмашинуви орқали амалга оширилмоқда. Якунда энг омадли вакцина ушбу давлатларда оммавий тарзда ишлаб чиқарилади ва бошқа давлатлар ҳам ундан фойдаланиши мумкин бўлади.
«Битта вакцина билан бутун ер юзи аҳолисини қамраб олишнинг имкони йўқ, ишлаб чиқаришга йиллар кетади, шунинг учун ҳам вакцинани бир нечта давлатлар бир вақтнинг ўзида ишлаб чиқишга ҳаракат қилиши энг тўғри қарор», – деган у.
Таиландда ишлаб чиқилаётган вакцина РНК-вакцина ҳисобланади ва унинг таъсирида инсон организми коронавирусга қарши антитаналар ишлаб чиқаради.
Изоҳ (0)