Amerikaning The New York Times gazetasi 24-may kungi sonining birinchi sahifasini mamlakatdagi koronavirus qurbonlariga bag‘ishlab, ularning familiyalarini chop etdi. Bu haqda nashr saytida xabar berildi.
Gazetaning bosma versiyasi “Qurbonlar soni 100 mingga yaqinlashmoqda, mislsiz yo‘qotishlar” sarlavhasi ostida chiqqan bo‘lib, qisqa nekrolog ham chop etilgan. “Ro‘yxatda shunchaki ismlar emas, bu — biz”, — deyiladi sarlavha ostida.
Maqola mualliflarining ta’kidlashicha, koronavirusning AQShga ta’sirini raqamlar bilan o‘lchab bo‘lmaydi.
“Mamlakatda virus oqibatida vafot etganlar soni dahshatli 100 mingga yaqinlashayotganida, New York Times nekrologlarni o‘rganib chiqdi va odamlarning o‘limi haqida xabar berdi. Mazkur ming kishi — qurbonlar ro‘yxatining bir foizi, xolos”, — deyiladi maqolada.
Shuningdek, jurnalistlar koronavirus oqibatida vafot etgan ming kishining yoshi, yashash joyi va nima bilan shug‘ullanganini qisqacha eslab o‘tgan. Birinchi sahifada chop etilgan ro‘yxat gazetaning 22-sahifasida davom etadi.
“100 yildan keyin ortga nazar tashlaganimizda, qanday yo‘qotishlarga duch kelganimizni tushunishimizni istardim”, — deydi The New York Times muharrirlaridan biri Mark Leysi.
22-may kuni AQSh prezidenti Donald Tramp barcha federal binolar va milliy monumentlardagi bayroqlarni koronavirus oqibatida vafot etgan amerikaliklar xotirasi uchun uch kunga tushirib qo‘yish bo‘yicha topshiriq bergandi.
Jons Hopkins universiteti ma’lumotlariga ko‘ra, AQShda koronavirusga chalinganlar soni 1,6 million kishidan oshgan, hozirga qadar 97 087 kishi virus qurboniga aylangan.
Izoh (0)