Tunis Sog‘liqni saqlash vazirligi mamlakatdagi koronavirusga aloqador statistik ma’lumotlarni e’lon qildi va unga ko‘ra, oxirgi uch sutka davomida Afrika qit’asidagi ushbu davlat hududida koronavirusni yuqtirib olgan birorta ham bemor qayd etilmadi.
“Oxirgi uch sutka davomida birorta ham kasallanish holati ro‘yxatga olinmagan”, — deyiladi Tunis SSVning Facebook’dagi rasmiy sahifasida.
Tunisda 10-maydan buyon koronavirus bilan kasallanish holati kuzatilmagan va kasallanganlar soni 1032 nafarni tashkil qilmoqda, shundan 740 nafar bemor COVID-19 infeksiyasidan butunlay forig‘ bo‘lgan, deyiladi vazirlik bayonotida. Qolgan 247 nafar kishi orasidan faqat besh nafar fuqaro kasalxonada davolanmoqda.
8-maydan beri Tunisda koronavirus oqibatida vafot etish holatlari ham kuzatilmagan. Epidemiya boshlanganidan beri mamlakatda 45 nafar bemor kasallik tufayli hayotdan ko‘z yumgan.
Koronavirusga qarshi kurashish maqsadida Tunisda ham karaktin tartibi e’lon qilingan va unga rioya etilishi ustidan nazorat armiya va harbiylarga topshirilgan, ular vertolyotlar vositasida aholining qoidalarga amal qilishini kuzatib borgandi. 4-maydan Tunisda cheklovlarni bosqichma-bosqich yumshatish boshlandi — davlat idoralari faoliyati qayta yo‘lga qo‘yildi, qurilish, xizmat ko‘rsatish sohalaridagi korxonalarning ishlashiga ham ruxsat berildi. 11-maydan kichik va o‘rta biznes korxonalari, xususan, savdo muassasalarining ishlashiga ruxsat berildi, katta savdo markazlari hali ham karantinda. Tunisda 24-maydan boshlab madaniyat, sport, dam olish va ko‘ngilochar obyektlar, jumladan, restoran, kafe va bozorlar ochilishi mumkinligi taxmin qilinmoqda.
Izoh (0)