AQSh Rossiya prezidenti Vladimir Putin va Shimoliy Koreya yetakchisi Kim Chen Inning sog‘lig‘idan xavotir olishga asos bo‘luvchi hech qanday sabab ko‘rmayapti. “RBK”ning yozishicha, bu haqda jurnalistlarga Donald Trampning milliy xavfsizlik bo‘yicha maslahatchisi Robert O’Brayen ma’lum qilgan.
“Prezident (Tramp) o‘tgan haftada Putin bilan suhbatlashgan edi. U yaxshi kayfiyatda va tetik edi. Bizda buning aksi deb taxmin qilish uchun sabab yo‘q”, — degan O’Brayen.
Bundan tashqari AQSh hukumati KXDR yetakchisi Kim Chen In ham salomat, degan fikrda. “U o‘g‘it zavodi ochilishida lentalarni kesgandi, demak aftidan, unda hammasi joyida”, — deya qo‘shimcha qilgan Tramp maslahatchisi.
Eslatib o‘tamiz, aprel oyida CNN telekanali Kim Chen Inning yuragi operatsiya qilingani va sog‘lig‘i yomonlashgani haqida xabar bergandi. Unda Kim Chen In so‘nggi marta 11-aprel kuni ommaga ko‘rinish bergani, shuningdek, u Kim Ir Sen tug‘ilganiga 108 yil to‘lishi munosabati bilan 15-apreldagi marosimni o‘tkazib yuborgani ta’kidlangan. Yaponiyaning Shukan Gendai nashri u operatsiyadan keyin og‘ir ahvolda ekanini yozgan. Shundan so‘ng xorijdagi bir qator OAVda Shimoliy Koreya yetakchisining sog‘lig‘i xavf ostida ekani haqidagi xabarlar tarqalishiga sabab bo‘lgan.Biroq AQSh prezidenti Donald Tramp Kim Chen Inning sog‘lig‘i yomonlashgani to‘g‘risidagi ma’lumotlar xato ekanligini bildirib, CNN’ga doim ham ishonavermasligini aytgan. 27-aprel kuni Janubiy Koreya prezidenti maslahatchisi KXDR yetakchisi soppa-sog‘ ekanligini ma’lum qilgandi.
Putin 5-may kuni Kim Chen Inni “1941—1945-yillarda sodir bo‘lgan Ulug‘ Vatan urushida erishilgan g‘alabaning 75 yilligi” yubiley medali bilan taqdirladi. Medalni Rossiya elchisi Aleksandr Matsegor KXDR tashqi ishlar vaziri Li Son Gvonga topshirgan.
12-may kuni esa Rossiya prezidenti matbuot kotibi Dmitriy Peskov esa koronavirusga chalinib, kasalxonaga yotqizilganini ma’lum qilgandi. U so‘nggi marta 30-aprelda Vladimir Putin raisligi bo‘lib o‘tgan yig‘ilishda ommaga ko‘rinish bergan. Putinning o‘zi bilan esa u taxminan bir oy avval bevosita ko‘rishib, muloqot qilgan.
Izoh (0)