Тунисда охирги уч кун ичида COVID-19’ни юқтириб олиш билан боғлиқ бирорта ҳам ҳолат қайд этилмади

Тунис Соғлиқни сақлаш вазирлиги мамлакатдаги коронавирусга алоқадор статистик маълумотларни эълон қилди ва унга кўра, охирги уч сутка давомида Африка қитъасидаги ушбу давлат ҳудудида коронавирусни юқтириб олган бирорта ҳам бемор қайд этилмади.

«Охирги уч сутка давомида бирорта ҳам касалланиш ҳолати рўйхатга олинмаган», — дейилади Тунис ССВнинг Facebook’даги расмий саҳифасида.

Тунисда 10 майдан буён коронавирус билан касалланиш ҳолати кузатилмаган ва касалланганлар сони 1032 нафарни ташкил қилмоқда, шундан 740 нафар бемор COVID-19 инфекциясидан бутунлай фориғ бўлган, дейилади вазирлик баёнотида. Қолган 247 нафар киши орасидан фақат беш нафар фуқаро касалхонада даволанмоқда.

8 майдан бери Тунисда коронавирус оқибатида вафот этиш ҳолатлари ҳам кузатилмаган. Эпидемия бошланганидан бери мамлакатда 45 нафар бемор касаллик туфайли ҳаётдан кўз юмган.

Коронавирусга қарши курашиш мақсадида Тунисда ҳам карактин тартиби эълон қилинган ва унга риоя этилиши устидан назорат армия ва ҳарбийларга топширилган, улар вертолётлар воситасида аҳолининг қоидаларга амал қилишини кузатиб борганди. 4 майдан Тунисда чекловларни босқичма-босқич юмшатиш бошланди — давлат идоралари фаолияти қайта йўлга қўйилди, қурилиш, хизмат кўрсатиш соҳаларидаги корхоналарнинг ишлашига ҳам рухсат берилди. 11 майдан кичик ва ўрта бизнес корхоналари, хусусан, савдо муассасаларининг ишлашига рухсат берилди, катта савдо марказлари ҳали ҳам карантинда. Тунисда 24 майдан бошлаб маданият, спорт, дам олиш ва кўнгилочар объектлар, жумладан, ресторан, кафе ва бозорлар очилиши мумкинлиги тахмин қилинмоқда.