Toshkentdagi Epidemiologiya, mikrobiologiya va yuqumli kasalliklari ilmiy-tekshirish instituti klinikasida 5 nafar va Surxondaryo viloyatida 1 nafar koronavirus infeksiyasiga chalingan bemor sog‘ayib, reabilitatsiyaga kuzatildi. Bu haqda Sog‘liqni saqlash vazirligi xabar qildi.
Epidemiologiya, mikrobiologiya va yuqumli kasalliklari ilmiy-tekshirish instituti klinikasida sog‘ayganlarning barchasi erkak, 3 nafar xalqaro yuk tashish avtomashinasi haydovchisi Qozog‘iston orqali, 2 nafari esa Rossiyadan kelgan va karantinga olingan. Koronavirus infeksiyasi tasdiqlangach, shifoxonaga joylashtirilgan. Ulardan 2 nafari Farg‘ona viloyatidan, qolganlari mos ravishda Surxondaryo, Qashqadaryo va Sirdaryo viloyatlaridan. Eng yoshi kattasi 54 da bo‘lsa, eng kichigi 24 yoshda.
Toshkent shahrida COVID-19 kasalligidan shifo topganlarning umumiy soni 616 nafarga yetdi.
Surxondaryoda tuzalgan 35 yoshli ayol esa Farg‘ona viloyatida yashaydi. U Moskva—Termiz yo‘nalishidagi charter reys bilan kelgan va karantinga olingan. Koronavirus infeksiyasi tasdiqlangach, shifoxonaga joylashtirilgan. Surxondaryo viloyatida shu paytga qadar sog‘ayganlar soni 36 nafarni tashkil qilmoqda.
2020-yil 11-may soat 20:00 holatiga ko‘ra, bir sutka ichida 107 nafar bemor koronavirus infeksiyasidan forig‘ bo‘lgan va O‘zbekistonda COVID-19’dan sog‘ayganlarning umumiy soni 1988 nafarga yetgan.
2020-yil 11-may soat 23:00 holatiga ko‘ra, O‘zbekistonda koronavirusga chalinganlar soni 2486 nafarni tashkil qilib, sog‘aygan va vafot etganlardan tashqari jami 488 nafar bemor davolanmoqda.
O‘zbekistonda 15-martdan buyon 10 kishi koronavirus infeksiyasi asoratlari oqibatida vafot etgan.
Izoh (0)