Тошкентдаги Эпидемиология, микробиология ва юқумли касалликлари илмий-текшириш институти клиникасида 5 нафар ва Сурхондарё вилоятида 1 нафар коронавирус инфекциясига чалинган бемор соғайиб, реабилитацияга кузатилди. Бу ҳақда Соғлиқни сақлаш вазирлиги хабар қилди.
Эпидемиология, микробиология ва юқумли касалликлари илмий-текшириш институти клиникасида соғайганларнинг барчаси эркак, 3 нафар халқаро юк ташиш автомашинаси ҳайдовчиси Қозоғистон орқали, 2 нафари эса Россиядан келган ва карантинга олинган. Коронавирус инфекцияси тасдиқлангач, шифохонага жойлаштирилган. Улардан 2 нафари Фарғона вилоятидан, қолганлари мос равишда Сурхондарё, Қашқадарё ва Сирдарё вилоятларидан. Энг ёши каттаси 54 да бўлса, энг кичиги 24 ёшда.
Тошкент шаҳрида COVID-19 касаллигидан шифо топганларнинг умумий сони 616 нафарга етди.
Сурхондарёда тузалган 35 ёшли аёл эса Фарғона вилоятида яшайди. У Москва—Термиз йўналишидаги чартер рейс билан келган ва карантинга олинган. Коронавирус инфекцияси тасдиқлангач, шифохонага жойлаштирилган. Сурхондарё вилоятида шу пайтга қадар соғайганлар сони 36 нафарни ташкил қилмоқда.
2020 йил 11 май соат 20:00 ҳолатига кўра, бир сутка ичида 107 нафар бемор коронавирус инфекциясидан фориғ бўлган ва Ўзбекистонда COVID-19’дан соғайганларнинг умумий сони 1988 нафарга етган.
2020 йил 11 май соат 23:00 ҳолатига кўра, Ўзбекистонда коронавирусга чалинганлар сони 2486 нафарни ташкил қилиб, соғайган ва вафот этганлардан ташқари жами 488 нафар бемор даволанмоқда.
Ўзбекистонда 15 мартдан буён 10 киши коронавирус инфекцияси асоратлари оқибатида вафот этган.
Изоҳ (0)