Andijonda fuqaroning avtomashinasini jarima maydonchasidan chiqarib berish evaziga pora olishga uringan viloyat transport boshqarmasi bo‘lim boshlig‘i qo‘lga olindi. Bu haqda Bosh prokuratura “Daryo”ga ma’lum qildi.
Ma’lumotlarga ko‘ra, Bosh prokuratura huzuridagi departamentning Shahrixon tuman bo‘limi tomonidan fuqaro K.K.ning murojaati bo‘yicha DXX va IIB xodimlari bilan hamkorlikda tezkor tadbir o‘tkazilgan.
Ta’kidlanishicha, Andijon viloyat transport boshqarmasi bo‘limi boshlig‘i M.A. fuqaro K.K.ning maxsus ruxsatnomasiz aholiga pullik transport xizmati ko‘rsatib kelayotganligi holati bo‘yicha jarima maydonchasiga qo‘yilgan Nexia rusumli avtomashinasini jarima maydonchasidan chiqarib berishni va’da qilgan. Mazkur holat yuzasidan ma’muriy bayonnoma rasmiylashtirmaslik evaziga M.A. bir million so‘mni fuqaro M.Sh. orqali pora tariqasida olgan vaqtida ashyoviy dalil bilan ushlangan.
Mazkur holat yuzasidan Jinoyat kodeksining tegishli moddasi bilan jinoyat ishi qo‘zg‘atilib, tergov harakatlari o‘tkazilmoqda.
Aprel oyining oxirlarida Andijonda Agroinspeksiya tuman bo‘limi boshlig‘i 10 ming dollar pora bilan qo‘lga tushgani haqida xabar berilgandi.
Izoh (0)