Turkmaniston poytaxti Ashxobod shahrida 9-may kuni Ikkinchi jahon urushida erishilgan g‘alabaning 75 yilligi munosabati bilan harbiy parad o‘tkazildi, deb xabar beradi “Xronika Turkmenistana”.
9-may tongida mamlakat prezidenti Gurbanguli Berdimuhamedov, hukumat a’zolari, faxriylar va diplomatlar “Mangu olov” qarshisiga gulchambarlar qo‘ygan. Shundan so‘ng Turkmaniston rahbari Ashxobodga kelgan Rossiya mudofaa vaziri o‘rinbosari general-polkovnik Aleksandr Fomin bilan uchrashgan.
Fomin Berdimuhamedovga Ukraina frontining 206-o‘qchi diviziyasi 748-o‘qchi polkining jangovar bayrog‘ini topshirgan. Ushbu polkda prezidentning bobosi — Berdimuhamed Annayev jang qilgan.
Kechga yaqin esa “Xalq xotirasi” memorial kompleksida Ikkinchi jahon urushiga tegishli harbiy texnikalar paradi bo‘lib o‘tgan.
“Turkmaniston o‘zining minglab jasur o‘g‘il va qizlarini Vatan ozodligi uchun qonli jangga yuborib, shuningdek, front uchun zarur bo‘lgan mahsulotlarni ishlab chiqarib g‘alabaga munosib hissa qo‘shgan”, — deydi Berdimuhamedov.
Prezidentining ta’kidlashicha, Turkmanistonning 70 mingdan ortiq jangchisi turli medal va ordenlar bilan taqdirlangan, 104 nafari Sovet Ittifoqi Qahramoni nomiga sazovor bo‘lgan, 15 nafari esa “Shon-sharaf” ordenining to‘liq kavalyeriga aylangan.
Nashrning ta’kidlashicha, bu Turkmaniston tarixida G‘alaba kuniga bag‘ishlab o‘tkazilgan ilk harbiy parad hisoblanadi. Bunga qadar paradlar faqatgina Mustaqillik kunida o‘tkazilgan. 2018-yildan buyon mamlakatda 9-may dam olish kuni hisoblanmaydi.
Mavzuga doir: Video: Toshkentda 9-may mushakbozligi
Izoh (0)