Feldmarshal Xalifa Xaftar boshqaruvidagi Liviya milliy armiyasi fuqarolar va fuqarolik tuzilmalariga hujum qilishi oqibatida Tripolidagi Turkiya elchixonasiga zarar yetgan. Bu kabi holatlar takrorlanadigan bo‘lsa, Turkiya qo‘shinlari ushbu holatlarga javob tarzida armiyaga o‘t ochishga majbur bo‘ladi, deyilgan Turkiya TIV xabarida.
Vazirlik xabarida 9-may kuni Xaftarga aloqador guruhlar Tripoli markaziga 100 dan ortiq raketa yo‘llagan va artilleriya bilan shaharni faol tarzda o‘qqa tutgan.
Bir necha kun davom etgan havo hujumlari oqibatida poytaxtdagi diplomatik missiyalar, jumladan, Turkiya elchixonasi, Mitiga aeroporti, parvozga tayyorlanayotgan fuqaro aviatsiyasi samolyotlari va boshqa fuqarolik infratuzilmasi obyektlari talafot ko‘rgan. Hujumlar tufayli o‘lganlar va yaralanganlar bor, deyiladi Turkiya TIV axborotida.
“Ushbu voqealarga javoban Liviyadagi rasmiy vakolatxonamiz va manfaatlarimizga zarba beriladigan bo‘lsa, Xaftar boshqaruvidagi guruhlarga qonuniy yo‘l bilan javob hujumi uyushtiramiz”, — deyiladi xabarda.
Vazirlik Birlashgan Millatlar Tashkilotining Liviyadagi ushbu notinch vaziyatga hech qanday munosabat bildirmayotganini tanqid qilgan.
“Xaftarga harbiy, moliyaviy va siyosiy yordam ko‘rsatayotgan kuchlar Liviya xalqining azoblari, mamlakatdagi inqiroz va beqaror vaziyat hukmron bo‘lishiga aloqador va bunda bevosita aybdor”, — deyilgan vazirlik axborotida.
28-aprelda feldmarshal Xalifa Xaftar tinchlik kelishuvidan chiqdi va mamlakatni boshqarishga qaror qildi, oqibatda Liviyada milliy ittifoq hukumati shakllandi va uni Faiz Sarroj boshqarmoqda.
“Biz Sxirat siyosiy kelishuvini bekor qilamiz. U Liviya xalqining qaroriga ko‘ra o‘tmish sarqiti, deb topildi va hukumat manbasi bo‘la olmaydi”, — degan u.
Xaftarning qayd etishicha Liviya milliy ittifoqi fuqarolik va davlat institutlari uchun sharoitlar yaratish ustida ishlaydi va Liviya xalqini ozod qilishda davom etadi. Feldmarshal o‘z boshqaruvidagi kuchlar xalqning azoblariga chek qo‘yish, fuqarolar manfaatlarini himoya qilish, ularning istaklarini bajo keltirib farovonligi uchun kurashadi.
Ikki kun o‘tgach, Liviya milliy ittifoqi vakili Ahmad al-Mismariy Ramazon oyida Xaftar armiyasining mamlakatdagi harbiy harakatlarni to‘xtatishini ma’lum qildi. U qo‘shinning ushbu tinchlik ahdlashuvini buzganlarga nisbatan javob harakatlarini amalga oshirishi haqida ogohlantirgan.
Ushbu bayonotga qaramay Liviyadagi harbiy harakatlar davom etgan. Xususan, 7-mayda Italiya va Turkiya hukumatlari Tripolidagi “yashil hudud”ning o‘qqa tutilganini xabar qildi. Ertasiga Italiya hukumati ushbu hujum ortida Xaftar boshqaruvidagi guruhlar turganini bildirdi. Liviya milliy ittifoqi vakili Tripolidagi fuqarolar yashaydigan hududlar va diplomatiya obyektlariga uyushtirilgan hujumlarga Xaftar armiyasining aloqasi yo‘qligini ma’lum qildi.
Izoh (0)