Navoiyda koronavirusga chalingan bir nafar bemor qoldi. SSV 2086 nafar bemor haqida hududlar kesimida ma’lumot berdi

Sog‘liqni saqlash vazirligi O‘zbekistonda koronavirus infeksiyasiga chalinganlar, undan tuzalganlar haqidagi statistik ma’lumotlarni e’lon qildi.

Infografikaga ko‘ra, 2086 nafar bemorning 639 nafari Toshkent shahri va Toshkent viloyatida davolanmoqda. Shundan 380 nafari, ya’ni 58 foizi kasallikdan tuzalgan. 5 nafar bemor infeksiya oqibatida vafot etgan.

Ma’lumot bo‘yicha Sirdaryo, Samarqand va Namangan viloyatlarida koronavirusdan tuzalganlar soni ko‘p emas. Ko‘rsatkich mos ravishda 21, 24 va 33 foizni tashkil qilmoqda.

Jizzax hamda Qashqadaryo viloyalarida koronavirus bilan kasallanganlarning hammasi COVID-19’dan tuzalgan.

Buxoro, Andijon va Xorazm viloyatlarida ham bu boradagi ishlar muvaffaqiyatli ketayotgani jadvaldagi raqamlarda aks etgan. Navoiy viloyatida 2 nafar odamda koronavirus aniqlangan va bir nafari tuzalib, yana bir nafari sog‘aysa, ushbu hududda ham COVID-19 bilan kasallanganlar qolmaydi.

Xorijda 73 o‘zbekistonlikda koronavirus aniqlangan (ularning eng ko‘pi — 42 nafari Rossiya Federatsiyasida), bemorlarning to‘rt nafari vafot etgan.