Соғлиқни сақлаш вазирлиги Ўзбекистонда коронавирусга чалинган беморлар ҳамда касалликдан тузалганлар юзасидан инфографика тарзида қўшимча маълумотлар берди.
Инфографикага кўра, Ўзбекистонда коронавирусни юқтириб олган 1969 нафар бемордан 1066 нафари, яъни 53 фоизи касалликдан тузалган.
Ҳудудлар кесимида Қорақалпоғистон Республикасида 109 кишида коронавирус қайд этилган, шундан 62 нафари (57 фоиз) инфекциядан тузалган. Андижонда эса 154 нафар касалланган бемордан 88 нафари (57 фоиз) соғайган.
Коронавирусни юқтириб олиш бўйича энг кўп — 615 та ҳолат Тошкент шаҳрида кузатилган. Шаҳардаги беморларнинг 52 фоизи, яъни 320 нафари COVID-19’дан тузалган. Кейинги ўринларни Бухоро (395 беморнинг 300 нафари, яъни 76 фоизи тузалган) ҳамда Хоразм вилоятлари (223 беморнинг 121 нафари, яъни 54 фоизи соғайган) эгаллаб турибди. Қашқадарё вилоятида коронавирус билан касалланганлар 6 нафарни ташкил этади: шундан 5 нафари (83 фоизи) касалликдан тузалган. Аввал Жиззахда коронавирус билан касалланганларнинг барчаси соғайгани маълум қилинганди.
Касалликдан вафот этганлар кўрсаткичи бўйича ҳам Тошкент шаҳри етакчи — 4 нафар бемор ҳаётдан кўз юмган. Наманган вилоятида 3 киши, Фарғона вилоятида 1 нафар бемор коронавирус оқибатида вафот этган.
Жадвалга кўра, касалликдан тузалиш кўрсаткичи ҳозирча Самарқанд (17 фоиз), Сирдарё (21 фоиз) ва Наманган вилоятларида (36 фоиз) нисбатан сустроқ экани маълум бўлмоқда.
Аввал Ўзбекистонда 29 апрель соат 15:30 ҳолатига кўра, коронавирус инфекциясини юқтириб олганлар сони 14 кишига кўпайиб, 1969 нафарга етгани, 29 апрель соат 16:10 ҳолатига кўра, 74 нафар бемор тузалиб, Ўзбекистонда COVID-19 коронавирус инфекциясидан бутунлай соғайганлар 1066 нафарни ташкил қилгани ҳақида хабар берилганди. Ўзбекистонда 15 мартдан буён коронавирусга чалинган беморларнинг саккиз нафари вафот этган.
Изоҳ (0)