AQShning Nyu-York shahri olimlari jig‘ildon qaynashiga qarshi ishlatiladigan famotidin preparatini COVID-19 bilan xastalangan bemorlarni davolashda qo‘llash maqsadida uning klinik sinovlarini boshladi. Bu haqda Science jurnali xabar berdi.
“Tibbiyot tarixida bir maqsadga mo‘ljallangan dori boshqa kasallikda ham yordam berishi mumkin bo‘lgan ko‘plab misollar mavjud. Odamlar umid qilmoqda. Biz bu klinik sinovlarni o‘tkazishimiz kerak”, — deb ma’lum qilgan Faynshteyn nomidagi tibbiy tadqiqotlar instituti prezidenti Kevin Treysi.
Uning qo‘shimcha qilishicha, agar famotidin ish bersa, uni hamma joyda qo‘llash mumkin bo‘ladi, chunki u universal va arzon hisoblanadi va uni hamma joyda topish mumkin. Treysining so‘zlariga ko‘ra, famotidinning dastlabki sinovlari natijalari yaqin bir necha hafta ma’lum bo‘lishi mumkin.
Klinik sinovlar davomida preparat bemorlarning vena qon tomiriga yuboriladi. Uning dozasi jig‘ildon qaynashida qo‘llaniladigan dozadan to‘qqiz marta ko‘p bo‘ladi. Bugungi kunda dori vositasi 187 kishida sinovdan o‘tkazilmoqda, ularning sonini 1200 kishigacha oshirish rejalashtirilmoqda.
Eslatib o‘tamiz, AQShda bezgakka qarshi xloroxin preparatini koronavirusga chalingan bemorlarni davolashda qo‘llash bo‘yicha sinovlar to‘xtatildi. Tajribalar vaqtida avval taxmin qilinganidek, ayrim bemorlar yuragida muammolar kuzatildi va 20 nafar ko‘ngilli ushbu holat oqibatida vafot etdi.
Mavzuga doir:
- Olimlar COVID-19’ga qarshi kurashning 4 xil strategiyasini belgilab berdi
- AQShda dunyoda birinchi marta koronavirus vaksinasi odamda sinab ko‘rildi
- Kanadalik olimlar koronavirus ko‘payishini bloklovchi preparatni topdi
- Rossiya Sog‘liqni saqlash vazirligi mamlakatda koronavirusga qarshi preparat ishlab chiqilganini e’lon qildi
Izoh (0)