Rossiya Mudofaa vazirligi 900 nafarga yaqin harbiy koronavirus yuqtirib olganini ma’lum qildi

Rossiya armiyasida koronavirus yuqtirib olish bo‘yicha 874 ta holat qayd etilgan. Bu haqda Mudofaa vazirligiga tayanib, “TASS” xabar tarqatgan.

“Rossiya qurolli kuchlarida 26-aprelgacha o‘tkazilgan ommaviy test jarayonida 874 nafar harbiy xizmatchida koronavirus tahlillari ijobiy natija ko‘rsatgan”, — deyilgan agentlik asoslanayotgan hujjatda. Kasallanganlarning 245 nafari harbiy bo‘lmagan fuqarolik tuzilmalarining vakillari.

Ularning 314 nafari Mudofaa vazirligi gospitallarida davolanmoqda, yana 175 kishi xizmat joyidagi izolyatorlarga olingan. Olti nafar bemor fuqarolik kasalxonalarida, 379 nafar odam esa uyida “o‘zini yakkalash” tartibida izolyatsiya qilingan.

Bundan tashqari, vazirlik 192 ta holatda kasallikning harbiy o‘quv yurtlari o‘qituvchilari va kursantlarida kuzatilganiga aniqlik kiritgan. “RIA Novosti”ning vazirlikdagi manbaga tayanib, xabar berishicha, Mudofaa vazirligi oliy o‘quv yurtlarida 779 nafar odamda koronavirus aniqlangan. Mudofaa vaziri Sergey Shoygu harbiy ta’lim muassasalarida o‘quv yilini muddatidan avval yakunlash yuzasidan topshiriq bergan.

Rossiyada harbiylarda koronavirus yuqtirib olish holati kuzatilgani haqida 16-aprelda xabar qilingan. COVID-19 Tyumen oliy harbiy muhandislik bilim yurtining 14 nafar harbiy va bir nafar fuqarolik tuzilmasidagi xodimida aniqlangandi. Ertasiga koronavirus yuqtirib olish bo‘yicha yangi holatlar Moskvadagi Naximov dengiz qo‘shinlari bilim yurti talabalarida kuzatilgan.

Mudofaa vazirligi 23-aprel kuni xorij armiyasi uchun shifokorlar tayyorlash fakultetida ham baryer choralari ko‘rishdagi yanglish hisob-kitoblar tufayli Sankt-Peterburgdagi Kirov nomli harbiy-tibbiyot akademiyasi kursantlarida ham koronavirus yuqtirish holati qayd etilgan. Ushbu xabar tarqalganidan keyin akademiya rahbari ishdan ketdi. Kasallangan kursantlar soni oshkor qilinmagan.

Bir necha kun o‘tgach, Tverdagi Suvorov bilim yurtida kasallanganlar borligi ma’lum bo‘ldi. Talabalar izolyatsiya qilingan, biroq ularda kasallik belgilari kuzatilmagan. Suvorovda o‘qiydigan kursantlardan birining onasi bolalarning o‘zlari tibbiy niqob tikkani, shamollash alomati bo‘lgan yigitlarga ham tibbiy yordam qilinmaganini bildirgan. Keyinchalik Mudofaa vazirligi ushbu ma’lumotni inkor qilgan.