Koronavirus tarqalishi o‘chog‘i bo‘lgan Xitoyning Uxan shahri kasalxonalarida COVID-19’ga chalingan birorta bemor qolmadi. Bu haqda mamlakat Sog‘liqni saqlash milliy komissiyasi rasmiy vakili Mi Fen ma’lum qilgan.
“Uxandagi shifokorlar va ularga yordam bergan butun mamalakat tibbiyot xodimlarining birgalikdagi sa’y-harakatlari natijasida 26-aprel holatiga ko‘ra, Uxandagi kasalxonalarda koronavirus infeksiyasiga chalingan birorta bemor qolmadi”, — degan u brifingda.
Mamlakat Sog‘liqni saqlash milliy komissiyasining 25-aprel kuni e’lon qilgan statistikasida epidemiya boshlanganidan buyon Uxan shahri joylashgan Xubey provinsiyasida koronavirusga chalinish bo‘yicha 68 128 ta holat qayd etilgani (shundan 50 333 tasi Uxanda), ularning 63 604 nafari tuzalgani, 4 512 bemor vafot etgani ma’lum qilingan va kasalxonada 12 kishi qolgani aytilgan.
Avvalroq Uxanda koronavirusga chalingan bemorlarni davolashda yordam bergan qurilmalar Toshkentga olib kelingani xabar berilgan edi. O‘zbekistonda koronavirusga qarshi kurashda 15 nafar xitoylik shifokor va 1 nafar koreyalik mutaxassis ham ishtirok etmoqda. Bundan tashqari, O‘zbekiston Xitoydan uch marta gumanitar yordam yuklarini qabul qildi hamda mazkur mamlakatdan 200 mingta test tizimini sotib oldi.
Izoh (0)