Россия Мудофаа вазирлиги 900 нафарга яқин ҳарбий коронавирус юқтириб олганини маълум қилди

Россия армиясида коронавирус юқтириб олиш бўйича 874 та ҳолат қайд этилган. Бу ҳақда Мудофаа вазирлигига таяниб, «ТАСС» хабар тарқатган.

«Россия қуролли кучларида 26 апрелгача ўтказилган оммавий тест жараёнида 874 нафар ҳарбий хизматчида коронавирус таҳлиллари ижобий натижа кўрсатган», — дейилган агентлик асосланаётган ҳужжатда. Касалланганларнинг 245 нафари ҳарбий бўлмаган фуқаролик тузилмаларининг вакили.

Уларнинг 314 нафари Мудофаа вазирлиги госпиталларида даволанмоқда, яна 175 киши хизмат жойидаги изоляторларга олинган. Олти нафар бемор фуқаролик касалхоналарида, 379 нафар одам эса уйида «ўзини яккалаш» тартибида изоляция қилинган.

Бундан ташқари, вазирлик 192 та ҳолатда касалликнинг ҳарбий ўқув юртлари ўқитувчилари ва курсантларида кузатилганига аниқлик киритган. «РИА Новости»нинг вазирликдаги манбага таяниб, хабар беришича, Мудофаа вазирлиги олий ўқув юртларида 779 нафар одамда коронавирус аниқланган. Мудофаа вазири Сергей Шойгу ҳарбий таълим муассасаларида ўқув йилини муддатидан аввал якунлаш юзасидан топшириқ берган.

Россияда ҳарбийларда коронавирус юқтириб олиш ҳолати кузатилгани ҳақида 16 апрелда хабар қилинган. COVID-19 Тюмень олий ҳарбий муҳандислик билим юртининг 14 нафар ҳарбий ва бир нафар фуқаролик тузилмасидаги ходимида аниқланганди. Эртасига коронавирус юқтириб олиш бўйича янги ҳолатлар Москвадаги Нахимов денгиз қўшинлари билим юрти талабаларида кузатилган.

Мудофаа вазирлиги 23 апрель куни хориж армияси учун шифокорлар тайёрлаш факультетида ҳам барьер чоралари кўришдаги янглиш ҳисоб-китоблар туфайли Санкт-Петербургдаги Киров номли ҳарбий-тиббиёт академияси курсантларида ҳам коронавирус юқтириш ҳолати қайд этилган. Ушбу хабар тарқалганидан кейин академия раҳбари ишдан кетди. Касалланган курсантлар сони ошкор қилинмаган.

Бир неча кун ўтгач, Твердаги Суворов билим юртида касалланганлар борлиги маълум бўлди. Талабалар изоляция қилинган, бироқ уларда касаллик белгилари кузатилмаган. Суворовда ўқийдиган курсантлардан бирининг онаси болаларнинг ўзлари тиббий ниқоб тиккани, шамоллаш аломати бўлган йигитларга ҳам тиббий ёрдам қилинмаганини билдирган. Кейинчалик Мудофаа вазирлиги ушбу маълумотни инкор қилган.