O‘zbekiston O‘rmon xo‘jaligi davlat qo‘mitasi, Toshkent irrigatsiya va qishloq xo‘jaligini mexanizatsiyalash muhandislari instituti, Turkiya O‘rmon bosh boshqarmasi, Turkiya Kastamonu universiteti professor-o‘qituvchilari ishtirokida 17-aprel kuni sohadagi ilmiy va oliy ta’lim yo‘nalishlarida istiqbolli hamkorlikni rivojlantirish masalalari bo‘yicha onlayn-muloqot va muzokaralar tashkil etildi.
Muzokaralarda o‘rmonchilik, o‘rmon kadastri kabi sohalarda ikki mamlakat olimlari o‘rtasidagi hamkorlikni rivojlantirish, sohaning dolzarb muammolari bo‘yicha qo‘shma ilmiy loyihalarni ishlab chiqish, ularga O‘zbekiston Innovatsion rivojlanish vazirligi hamda Turkiyaning Fan va texnologiyalar tashkiloti grant mablag‘larini jalb etish bo‘yicha aniq takliflar ko‘rib chiqilgan.
Muloqot chog‘ida sohada mutaxassislar va talabalar almashinuvini yo‘lga qo‘yish, Toshkent irrigatsiya va qishloq xo‘jaligini mexanizatsiyalash muhandislari instituti va Toshkent davlat agrar universiteti bilan Turkiyadagi Kastamonu universiteti o‘rtasida Mevlana hamda Erasmus+ dasturlarini imzolash masalasi ham muhokama qilingan.
Toshkent irrigatsiya va qishloq xo‘jaligini mexanizatsiyalash muhandislari instituti matbuot xizmati rahbari Rahimboy Jumaniyozovning “Daryo”ga ma’lum qilishicha, onlayn-muloqot davomida O‘zbekistonda Turkiya universitetlari bilan birgalikda qo‘shma fakultet tashkil qilish imkoniyatlari muhokama qilingan. Tomonlar pandemiya tufayli joriy etilgan cheklovlar yakunlangach, Turkiya universitetlari vakillarining O‘zbekistonga safarini tashkil qilishga kelishib olgan.
Izoh (0)