Ўзбекистон Ўрмон хўжалиги давлат қўмитаси, Тошкент ирригация ва қишлоқ хўжалигини механизациялаш муҳандислари институти, Туркия Ўрмон бош бошқармаси, Туркия Кастамону университети профессор-ўқитувчилари иштирокида 17 апрель куни соҳадаги илмий ва олий таълим йўналишларида истиқболли ҳамкорликни ривожлантириш масалалари бўйича онлайн-мулоқот ва музокаралар ташкил этилди.
Музокараларда ўрмончилик, ўрмон кадастри каби соҳаларда икки мамлакат олимлари ўртасидаги ҳамкорликни ривожлантириш, соҳанинг долзарб муаммолари бўйича қўшма илмий лойиҳаларни ишлаб чиқиш, уларга Ўзбекистон Инновацион ривожланиш вазирлиги ҳамда Туркиянинг Фан ва технологиялар ташкилоти грант маблағларини жалб этиш бўйича аниқ таклифлар кўриб чиқилган.
Мулоқот чоғида соҳада мутахассислар ва талабалар алмашинувини йўлга қўйиш, Тошкент ирригация ва қишлоқ хўжалигини механизациялаш муҳандислари институти ва Тошкент давлат аграр университети билан Туркиядаги Кастамону университети ўртасида Mevlana ҳамда Erasmus+ дастурларини имзолаш масаласи ҳам муҳокама қилинган.
Тошкент ирригация ва қишлоқ хўжалигини механизациялаш муҳандислари институти матбуот хизмати раҳбари Раҳимбой Жуманиёзовнинг «Дарё»га маълум қилишича, онлайн-мулоқот давомида Ўзбекистонда Туркия университетлари билан биргаликда қўшма факультет ташкил қилиш имкониятлари муҳокама қилинган. Томонлар пандемия туфайли жорий этилган чекловлар якунлангач, Туркия университетлари вакилларининг Ўзбекистонга сафарини ташкил қилишга келишиб олган.
Изоҳ (0)