Rossiyadagi kasalxonalardan birida 9 nafar tibbiyot xodimi koronavirus yuqtirib oldi

Moskva viloyatida 3-Lyuberetskiy viloyat kasalxonasida 9 nafar tibbiyot xodimining koronavirusga topshirgan test natijalari ijobiy chiqdi. Bu haqda “RBK” xabar bergan. Testlar 3—13-aprel oralig‘ida amalga oshirilgan.

Lyuberetskiy viloyat kasalxonasi 3 ta statsionar, 12 ta poliklinika bo‘limlarini, jumladan, markaziy va uchta bolalar poliklinikalarini o‘zida birlashtirgan. Kasalxona rasmiy saytidagi ma’lumotga ko‘ra u yerda 3 mingdan ziyod xodim faoliyat olib boradi.

Mart oxirida muassasaning yuqumli kasalliklar statsionar bo‘limiga 111 ta kasallar uchun joy tayyorlangani va u yerda koronavirus infeksiyasini yuqtirib olgan bemorlar joylashtirilishi haqida xabarlar tarqalgandi. Xabarlarda koronavirus oqibatida pnevmoniyaga chalingan bemorlarning statsionar kasalxonaning terapiya bo‘limida qabul qilinayotgani ta’kidlangan.

Kasalxonada ishlovchi tibbiyot xodimining aytishicha, u yerdagi shifokorlar pnevmoniyaga chalingan bemorlar bilan muloqot qilishdan qo‘rqmoqda, sababi muassasada shaxsiy himoya vositalari yetishmaydi. Kasalxona bosh shifokorining o‘rinbosari Iraida Shtolts ushbu vaziyatga izoh berishdan bosh tortgan.

“Biz telefon orqali izoh bermaymiz. Bundan boshqa qiladigan ishimiz ko‘p — ishlayapmiz”, — degan Shtolts.

Moskva viloyati sog‘liqni saqlash boshqarmasi esa koronavirus infeksiyasi tarqalgani hozirgi sharoitda barcha tibbiyot xodimlari o‘z sog‘lig‘i ustida tavakkal qilyotganini ta’kidlagan va tibbiyot xodimi yoki bemorda koronavirus infeksiyasi aniqlansa, barcha sanitar-epidemiologik choralar ko‘rilishini, Lyuberetskiy kasalxonasida ham shunday qilinganini bildirgan. Boshqarma ma’lumotiga ko‘ra, koronavirus aniqlangan bemorlar tezkorlik bilan infeksion statsionar davolash bo‘limlariga o‘tkazilmoqda.

“Pnevmoniya belgilari bilan kasalxonaga kelgan har qanday bemordan majburiy tartibda koronavirusga test olinmoqda. Koronavirus infeksiyasini yuqtirib olgan tibbiyot xodimlariga individual himoya vosiyalari tarqatilmoqda, kasalxonada ularning soni yetarli miqdorda. COVID-19 bilan kasallangan bemorlar bilan muloqotda bo‘layotgan xodimlarning hammasidan doimiy ravishda tibbiy kuzatuvlar asosida koronavirusga testlar olinmoqda”, — deya ma’lum qilgan viloyat sog‘liqni saqlash boshqarmasi.

Avval Rossiya sog‘liqni saqlash vazirligi shifokorlarda himoya vositalarining yetishmasligi bozordagi inqiroz bilan bog‘liqligini tushuntirgan. Hatto yetarli darajada moliyaviy manbalarga ega tibbiyot muassasalari ham kerakli vositalarni xarid qila olmayotganini bildirgandi.

Moskva shahrida 14-apreldan boshlab barcha tibbiyot xodimlari koronavirusga immunitet hosil qilish bo ‘yicha test topshiradi. Bu haqda “Rospotrebnadzor” rahbari Anna Popova ma’lum qilgan. Antitana tahlil natijalari tibbiyot xodimlarining kasallikdan qay darajada himoyalanganini ko‘rsatishi lozim.

Eslatib o‘tamiz, O‘zbekistonda koronavirus yuqtirib olish bo‘yicha birinchi holat 15-mart kuni qayd etilgan, kasallangan birinchi bemor oliy toifali shifokor ekani aytilgan.