Москва вилоятида 3-Люберецкий вилоят касалхонасида 9 нафар тиббиёт ходимининг коронавирусга топширган тест натижалари ижобий чиқди. Бу ҳақда «РБК» хабар берган. Тестлар 3—13 апрель оралиғида амалга оширилган.
Люберецкий вилоят касалхонаси 3 та стационар, 12 та поликлиника бўлимларини, жумладан, марказий ва учта болалар поликлиникаларини ўзида бирлаштирган. Касалхона расмий сайтидаги маълумотга кўра, у ерда 3 мингдан зиёд ходим фаолият олиб боради.
Март охирида муассасанинг юқумли касалликлар стационар бўлимига 111 та касаллар учун жой тайёрлангани ва у ерда коронавирус инфекциясини юқтириб олган беморлар жойлаштирилиши ҳақида хабарлар тарқалганди. Хабарларда коронавирус оқибатида пневмонияга чалинган беморларнинг стационар касалхонанинг терапия бўлимида қабул қилинаётгани таъкидланган.
Касалхонада ишловчи тиббиёт ходимининг айтишича, у ердаги шифокорлар пневмонияга чалинган беморлар билан мулоқот қилишдан қўрқмоқда, сабаби муассасада шахсий ҳимоя воситалари етишмайди. Касалхона бош шифокорининг ўринбосари Ираида Штольц ушбу вазиятга изоҳ беришдан бош тортган.
«Биз телефон орқали изоҳ бермаймиз. Бундан бошқа қиладиган ишимиз кўп — ишлаяпмиз», — деган Штольц.
Москва вилояти соғлиқни сақлаш бошқармаси эса коронавирус инфекцияси тарқалгани ҳозирги шароитда барча тиббиёт ходимлари ўз соғлиғи устида таваккал қилётганини таъкидлаган ва тиббиёт ходими ёки беморда коронавирус инфекцияси аниқланса, барча санитар-эпидемиологик чоралар кўрилишини, Люберецкий касалхонасида ҳам шундай қилинганини билдирган. Бошқарма маълумотига кўра, коронавирус аниқланган беморлар тезкорлик билан инфекцион стационар даволаш бўлимларига ўтказилмоқда.
«Пневмония белгилари билан касалхонага келган ҳар қандай бемордан мажбурий тартибда коронавирусга тест олинмоқда. Коронавирус инфекциясини юқтириб олган тиббиёт ходимларига индивидуал ҳимоя восиялари тарқатилмоқда, касалхонада уларнинг сони етарли миқдорда. COVID-19 билан касалланган беморлар билан мулоқотда бўлаётган ходимларнинг ҳаммасидан доимий равишда тиббий кузатувлар асосида коронавирусга тестлар олинмоқда», — дея маълум қилган вилоят соғлиқни сақлаш бошқармаси.
Аввал Россия соғлиқни сақлаш вазирлиги шифокорларда ҳимоя воситаларининг етишмаслиги бозордаги инқироз билан боғлиқлигини тушунтирган. Ҳатто етарли даражада молиявий манбаларга эга тиббиёт муассасалари ҳам керакли воситаларни харид қила олмаётганини билдирганди.
Москва шаҳрида 14 апрелдан бошлаб барча тиббиёт ходимлари коронавирусга иммунитет ҳосил қилиш бўйича тест топширади. Бу ҳақда «Роспотребнадзор» раҳбари Анна Попова маълум қилган. Антитана таҳлил натижалари тиббиёт ходимларининг касалликдан қай даражада ҳимояланганини кўрсатиши лозим.
Мавзуга доир: Италиялик шифокор тиббиёт ходимлари қандай қилиб коронавирус юқтириб олаётганини айтиб берди
Эслатиб ўтамиз, Ўзбекистонда коронавирус юқтириб олиш бўйича биринчи ҳолат 15 март куни қайд этилган, касалланган биринчи бемор олий тоифали шифокор экани айтилган.
Изоҳ (0)