Rossiya Qurolli Kuchlarida koronavirus bilan kasallanish bo‘yicha kamida uchta holat aniqlangan. Bu haqda “Kommersant” nashri 30-mart kuni ushbu ma’lumotlar bilan tanishgan o‘zining manbasiga tayanib xabar berdi.
Harbiy idora hukumatga yuborgan materiallarga ko‘ra, 1994-yilda tug‘ilgan praporshik (uyida davolanmoqda), polkovnik (hozirda Kommunarkadagi shifoxonada), shuningdek, Shimoliy flot michmanida (shifoxonada) kasallik aniqlangan.
Ta’kidlanishicha, koronavirusni yuqtirib olganlar bilan 60 dan ortiq harbiy xizmatchi muloqotda bo‘lgan. O‘z navbatida, ular bilan 130 dan ortiq askar aloqada bo‘lgan. Ularning barchasi izolyatsiyalangan, biroq birortasida infeksiya aniqlanmagan.
Mudofaa vazirligi kasallar soni ko‘proq bo‘lishiga tayyorgarlik ko‘rib qo‘ygan. Harbiy-tibbiy tashkilotlarda 4800 dan ortiq joy, shuningdek, kasallarni qabul qilishga 32 ta harbiy gospital tayyorlangan. Bundan tashqari, 30-martdan boshlab 700 kishini qabul qilishga qodir yettita mobil gospitallar shakllantirilgan.
Ta’kidlanishicha, mamlakatda koronavirusning tarqalishi bahorgi chaqiruv to‘g‘risidagi qarorga ta’sir ko‘rsatmagan. Rossiya prezidenti Vladimir Putinning tegishli farmoniga ko‘ra, 15-iyulga qadar mamlakat Qurolli Kuchlari 135 ming askar bilan butlanadi.
Avvalroq Rossiya Sog‘liqni saqlash vazirligi mamlakatda koronavirusga qarshi preparat ishlab chiqilganini e’lon qilgani haqida xabar berilgandi.
So‘nggi ma’lumotlarga ko‘ra, Rossiyada koronavirus bilan kasallanganlar soni 21 ming kishidan oshgan, 170 bemor vafot etgan.
Izoh (0)