Toshkent shahrida 8-aprel, chorshanba kuni, kuzatilgan kuchli shamol va qor 6968 ta daraxtga zarar yetkazdi. Bu haqda shahar Obodonlashtirish boshqarmasiga tayanib, “Gazeta.uz” xabar berdi.
Ma’lum qilinishicha, shahar bo‘ylab 745 ta daraxt ildizi bilan qulagan bo‘lsa, 6223 ta daraxtning shoxlari singan.
Eng ko‘p shikastlangan daraxtlar Yunusobod tumanida aniqlangan. Tumandagi 2504 ta daraxtning shoxlari singan, 244 ta daraxt qulab tushgan. Mirzo Ulug‘bek tumanida 763 ta, Yashnobod tumanida 633 ta, Olmazor tumanida 560 ta, Chilonzor, Uchtepa, Shayxontohur va Mirobod tumanlarida 400 tadan ortiq daraxt zarar ko‘rgan. Bektemir tumanida 68 ta, Yakkasaroyda 118 ta va Sergeli tumanida 252 ta daraxtga zarar yetgan.
Tozalash ishlari hozircha faqat magistral yo‘llarda davom etmoqda, mahallalarda tozalash endi boshlanadi. Karantin sababli Toshkent viloyatida istiqomat qiladigan xodimlarning poytaxtga kira olmasligi sababli 10 ming nafar ishchidan faqat 70 foizi tozalash ishlariga jalb qilingan.
Bundan tashqari, boshqarma avtotransport harakatlanishiga qo‘yilgan cheklovlar sababli qiyinchiliklarga duch kelmoqda. Kommunal xizmat ko‘rsatuvchi tashkilotlar maxsus xizmat avtotransportidan foydalanishi mumkin, lekin xodimlarning shaxsiy avtomobillari harakatlanishiga ruxsat berilmagan.
Toshkent shahar ekologiya va atrof-muhitni muhofaza qilish boshqarmasi inspektorlari ham shu kabi qiyinchiliklarga duch kelmoqda. Ma’lum qilinishicha, Boshqarma hozirda to‘liq rejimda faoliyat olib bormayapti.
Boshqarma boshlig‘i Nodir Yunusovning ma’lum qilishicha, ko‘plab xodimlar uydan turib ishlamoqda. Shahar bo‘yicha 59 ta inspektordan 37 tasi hozir ish faoliyatini davom ettirmoqda, lekin avtotransportlarda harakatlanishga ruxsat berilmaganligi bois qiyinchiliklar yuzaga kelmoqda.
Uning so‘zlariga ko‘ra, inspektorlar fuqarolar murojaatlari bo‘yicha joylarga yetib borishga harakat qilmoqda, ba’zi hollarda piyoda borishga to‘g‘ri kelmoqda. Fuqarolar @EcoControl_bot Telegram boti orqali o‘z murojaatlarini yuborishlari mumkin. Tadbirkorlar uchun esa “e-ekologiya.uz” tizimi ishga tushirilgan.
Nodir Yunusovning ma’lum qilishicha, singan daraxt shoxlari va qulagan daraxtlar obodonlashtirish boshqarmasida yig‘iladi. Hisobot tuzilgach, daraxtlar boshqarma balansiga o‘tkaziladi.
Avvalroq 8-apreldan 9-aprel kuniga o‘tar kechasi kuchli qor yog‘ishi Toshkent shahrining 5 ta tumanida ichimlik suvining vaqtincha uzilishiga sabab bo‘lgani hamda O‘zbekistonda kuchli shamol oqibatida kamida 63 ming xonadon elektr ta’minotisiz qolgani haqida xabar berilgan edi.
Izoh (0)