Тошкент шаҳрида 8 апрель, чоршанба куни, кузатилган кучли шамол ва қор 6968 та дарахтга зарар етказди. Бу ҳақда шаҳар Ободонлаштириш бошқармасига таяниб, «Gazeta.uz» хабар берди.
Маълум қилинишича, шаҳар бўйлаб 745 та дарахт илдизи билан қулаган бўлса, 6223 та дарахтнинг шохлари синган.
Энг кўп шикастланган дарахтлар Юнусобод туманида аниқланган. Тумандаги 2504 та дарахтнинг шохлари синган, 244 та дарахт қулаб тушган. Мирзо Улуғбек туманида 763 та, Яшнобод туманида 633 та, Олмазор туманида 560 та, Чилонзор, Учтепа, Шайхонтоҳур ва Миробод туманларида 400 тадан ортиқ дарахт зарар кўрган. Бектемир туманида 68 та, Яккасаройда 118 та ва Сергели туманида 252 та дарахтга зарар етган.
Тозалаш ишлари ҳозирча фақат магистрал йўлларда давом этмоқда, маҳаллаларда тозалаш энди бошланади. Карантин сабабли Тошкент вилоятида истиқомат қиладиган ходимларнинг пойтахтга кира олмаслиги сабабли 10 минг нафар ишчидан фақат 70 фоизи тозалаш ишларига жалб қилинган.
Бундан ташқари, бошқарма автотранспорт ҳаракатланишига қўйилган чекловлар сабабли қийинчиликларга дуч келмоқда. Коммунал хизмат кўрсатувчи ташкилотлар махсус хизмат автотранспортидан фойдаланиши мумкин, лекин ходимларнинг шахсий автомобиллари ҳаракатланишига рухсат берилмаган.
Тошкент шаҳар экология ва атроф-муҳитни муҳофаза қилиш бошқармаси инспекторлари ҳам шу каби қийинчиликларга дуч келмоқда. Маълум қилинишича, Бошқарма ҳозирда тўлиқ режимда фаолият олиб бормаяпти.
Бошқарма бошлиғи Нодир Юнусовнинг маълум қилишича, кўплаб ходимлар уйдан туриб ишламоқда. Шаҳар бўйича 59 та инспектордан 37 таси ҳозир иш фаолиятини давом эттирмоқда, лекин автотранспортларда ҳаракатланишга рухсат берилмаганлиги боис қийинчиликлар юзага келмоқда.
Унинг сўзларига кўра, инспекторлар фуқаролар мурожаатлари бўйича жойларга етиб боришга ҳаракат қилмоқда, баъзи ҳолларда пиёда боришга тўғри келмоқда. Фуқаролар @EcoControl_bot Telegram боти орқали ўз мурожаатларини юборишлари мумкин. Тадбиркорлар учун эса «e-ekologiya.uz» тизими ишга туширилган.
Нодир Юнусовнинг маълум қилишича, синган дарахт шохлари ва қулаган дарахтлар ободонлаштириш бошқармасида йиғилади. Ҳисобот тузилгач, дарахтлар бошқарма балансига ўтказилади.
Аввалроқ 8 апрелдан 9 апрель кунига ўтар кечаси кучли қор ёғиши Тошкент шаҳрининг 5 та туманида ичимлик сувининг вақтинча узилишига сабаб бўлгани ҳамда Ўзбекистонда кучли шамол оқибатида камида 63 минг хонадон электр таъминотисиз қолгани ҳақида хабар берилган эди.
Изоҳ (0)