Gruziya—Turkiya chegarasida O‘zbekistonning yuk tashuvchi transport vositalari qolib ketgani haqida qator OAV va ijtimoiy tarmoqlarda xabar tarqalgan. O‘zbekiston Tashqi ishlar vazirligi tomonidan ma’lum qilinishicha, koronavirus tarqalishini kamaytirish borasida ko‘rilayotgan shoshilinch choralar sababli Turkiya hududiga O‘zbekiston yuk tashuvchilarining kirishi cheklangan edi.
Vazirlik tomonidan xabar berilishicha, Turkiya va Gruziyaning mas’ul vazirlik va idoralari bilan olib borilgan muzokaralar natijasida mazkur masala ijobiy hal qilindi. Turkiya tomonidan olingan ma’lumotga ko‘ra, o‘zbekistonlik avtotashuvchilar Turkiya hududiga O‘zbekistondan chiqqan kunlaridan boshlab 14 kunlik muddat tugaganidan keyin kiritiladi.
Turkiya Bojxona idorasi va Savdo vazirligi 2020-yil 30-mart kuni kechasidan boshlab O‘zbekiston yuk tashuvchi transport vositalarini kiritish tiklanganligini tasdiqlagan. Bugunga qadar Gruziya—Turkiya chegarasini 50 dan ortiq yuk mashinasi kesib o‘tgan.
Vazirlikning qayd etishicha, O‘zbekistonning Anqara va Boku shaharlaridagi elchixonalari vaziyatni nazoratga olgan hamda davlatlararo chegarada 14 kunlik muddat tugashini kutayotgan o‘zbekistonlik haydovchilar bilan aloqada bo‘lib turibdi.
Eslatib o‘tamiz, o‘zbekistonlik 11 nafar haydovchi 7-mart kuni koronavirus tarqalishining oldini olish maqsadida Turkmaniston va Eron o‘rtasidagi chegara yopilishi sababli “Lutfobod” va “Saraxs” chegara nazorat-o‘tkazish punktlarida qolib ketgandi. Ular transport vositalarini bojxona postlarida qoldirib vatanga qaytishni rad etgan va O‘zbekistonga qaytarish masalasida Prezident Shavkat Mirziyoyevdan yordam so‘rab videomurojaat yo‘llagan. Shavkat Mirziyoyev mazkur haydovchilarni O‘zbekistonga qaytarish bo‘yicha alohida ko‘rsatma berdi. Keyinchalik mazkur haydovchilar Erondagi O‘zbekiston fuqarolari bilan birga charter reysda Namanganga olib kelinib, karantinga joylashtirilgan. 31-mart kuni ana shu karantin muddati tugadi va ular o‘z uylariga kuzatildi.
Izoh (0)