Adliya vaziri Ruslanbek Davletov “O‘zbekiston 24” telekanaliga bergan intervyusida maxsus ruxsatnomalarsiz harakatlanayotgan haydovchilarga qanday chora ko‘rilishi haqidagi savolga javob berdi.
“Javobgarlik masalasi bo‘yicha bir narsani tushuntirishimiz kerak. Bugungi kunda bu haydovchilar ko‘chaga chiqqani uchun yo‘l harakati qoidalarini buzganlik to‘g‘risida javobgarlikka tortilmaydi. Chunki ular yo‘l harakati qoidasini buzmayapti. Bu yerda karantin, epidemiologiyaga qarshi kurashish qonunlari bilan bog‘liq javobgarlik bor”, — dedi Davletov.
“Ma’muriy javobgarlik to‘g‘risidagi kodeksning 54-moddasi bo‘yicha karantin qoidalarini buzish degan modda bilan javobgarlikka tortiladi. Unda belgilangan jarimalar juda yuqori, 4 million so‘mdan boshlanadi. Shuning uchun hammaga tavsiya va talab ham shundan iboratki, bunga yo‘l qo‘ymaslik kerak”, – dedi Davletov va stikersiz harakatlanayotgan taksida “ikkita pitssa”ni o‘rindiqqa qo‘yib, o‘z ishlari bilan shug‘ullanib yurganlar ham borligini afsus bilan aytib o‘tdi.Adliya vaziri, ruxsatnoma beriladigan alohida holatlarga ham to‘xtalib o‘tdi. Uning aytishicha, Maxsus komissiyaning bayonida aniq yozilgan. U yerda asosiy mezonlarga to‘g‘ri kelmaydigan, hayotiy zaruriyat bo‘ladigan holatlarda maxsus komissiyaning to‘g‘ridan to‘g‘ri topshirig‘iga asosan Adliya vazirligining o‘zida ham stikerlar rasmiylashtirib beriladi.
“Bu – alohida hollarda. Masalan, to‘qimachilik sanoati korxonalarida bugungi kunda niqob ishlab chiqarilyapti. Niqob ishlab chiqarilishini to‘xtatmaslik uchun Toshkent shahrida joylashgan bo‘lsa, birga ishlab, eng minimal ravishda xodimlarni ishdan olib borib, olib kelishda zarur bo‘lgan xizmat mashinalariga individual ravishda ruxsat beryapmiz. Ana shunday holatlar uchun Adliya vazirligida bu shtabni tashkil qilganmiz”, – degan Ruslanbek Davletov.
Avvalroq Adliya vaziri stiker olmoqchi bo‘lgan “inomarka”lar ochiqlanishi aytilgandan so‘ng 9 mingga yaqin ariza qaytarib olinganini ma’lum qilgandi.
Eslatib o‘tamiz, O‘zbekistonda 30-mart kuni soat 06:00 dan shaxsiy transportdan foydalanishga cheklov qo‘yildi. Faqat Davlat xizmatlari markazlari tomonidan beriladigan maxsus ruxsatnoma (stiker)ga ega avtotransport vositalari harakatlanishiga ruxsat berildi.
Avtomashinasini tegishli tartibda olingan ruxsatnoma stikerisiz boshqargan haydovchilar bazaviy hisoblash miqdorining 20 baravaridan 30 baravarigacha, mansabdor shaxslar esa 30 baravaridan 50 baravarigacha miqdorda jarimaga tortilishi belgilandi. Toshkentda 1-apreldan boshlab maxsus ruxsatnomasiz avtomobil boshqarayotganlarga qarshi qo‘shma reyd boshlandi.
Izoh (0)