Грузия—Туркия чегарасида Ўзбекистоннинг юк ташувчи транспорт воситалари қолиб кетгани ҳақида қатор ОАВ ва ижтимоий тармоқларда хабар тарқалган. Ўзбекистон Ташқи ишлар вазирлиги томонидан маълум қилинишича, коронавирус тарқалишини камайтириш борасида кўрилаётган шошилинч чоралар сабабли Туркия ҳудудига Ўзбекистон юк ташувчиларининг кириши чекланган эди.
Вазирлик томонидан хабар берилишича, Туркия ва Грузиянинг масъул вазирлик ва идоралари билан олиб борилган музокаралар натижасида мазкур масала ижобий ҳал қилинди. Туркия томонидан олинган маълумотга кўра, ўзбекистонлик автоташувчилар Туркия ҳудудига Ўзбекистондан чиққан кунларидан бошлаб 14 кунлик муддат тугаганидан кейин киритилади.
Туркия Божхона идораси ва Савдо вазирлиги 2020 йил 30 март куни кечасидан бошлаб Ўзбекистон юк ташувчи транспорт воситаларини киритиш тикланганлигини тасдиқлаган. Бугунга қадар Грузия—Туркия чегарасини 50 дан ортиқ юк машинаси кесиб ўтган.
Вазирликнинг қайд этишича, Ўзбекистоннинг Анқара ва Боку шаҳарларидаги элчихоналари вазиятни назоратга олган ҳамда давлатлараро чегарада 14 кунлик муддат тугашини кутаётган ўзбекистонлик ҳайдовчилар билан алоқада бўлиб турибди.
Эслатиб ўтамиз, ўзбекистонлик 11 нафар ҳайдовчи 7 март куни коронавирус тарқалишининг олдини олиш мақсадида Туркманистон ва Эрон ўртасидаги чегара ёпилиши сабабли «Лутфобод» ва «Сарахс» чегара назорат-ўтказиш пунктларида қолиб кетганди. Улар транспорт воситаларини божхона постларида қолдириб ватанга қайтишни рад этган ва Ўзбекистонга қайтариш масаласида Президент Шавкат Мирзиёевдан ёрдам сўраб видеомурожаат йўллаган. Шавкат Мирзиёев мазкур ҳайдовчиларни Ўзбекистонга қайтариш бўйича алоҳида кўрсатма берди. Кейинчалик мазкур ҳайдовчилар Эрондаги Ўзбекистон фуқаролари билан бирга чартер рейсда Наманганга олиб келиниб, карантинга жойлаштирилган. 31 март куни ана шу карантин муддати тугади ва улар ўз уйларига кузатилди.
Изоҳ (0)