“YeOIIga a’zo bo‘lish natijasida mamlakatimiz sanoati 2 mlrd dollar yo‘qotadi” — “Adolat” partiyasi

Oliy Majlis Qonunchilik palatasidagi “Adolat” sotsial-demokratik partiyasi fraksiyasining O‘zbekistonning Yevrosiyo iqtisodiy ittifoqi bilan hamkorligini yo‘lga qo‘yish masalasiga bag‘ishlangan yig‘ilishi videokonferensiya tarzida bo‘lib o‘tdi. Bu haqda partiya matbuot xizmati xabar berdi.

Onlayn tarzdagi yig‘ilishda deputatlar, bosh vaziri maslahatchisi, Investitsiya va tashqi savdo hamda Iqtisodiy taraqqiyot va kambag‘allikni qisqartirish vazirliklari ma’sul vakillari ishtirok etdi.

Oliy Majlisga murojaatnomada O‘zbekistonning YeOII bilan hamkorligini yo‘lga qo‘yish masalasi bo‘yicha qaror qabul qilishda, eng avvalo, xalq manfaatlaridan kelib chiqib, ularning xohish-irodasiga tayanish lozimligiga alohida urg‘u berilgandi.

Ta’kidlanganidek, “Adolat” SDP fraksiyasi tomonidan maxsus ishchi guruhi tuzildi. Ular quyidagi yo‘nalishlarda tahlillar olib bormoqda:

• YeOIIga a’zo bo‘lish mamlakat uchun nima manfaat berishi yoki qanday salbiy oqibatlarga olib kelishi;
• qisqa, o‘rta va uzoq muddatli istiqboldagi milliy iqtisodiyot rivojlanishining ustuvor yo‘nalishlarini ittifoq bilan muosabatlardagi kesishmalari;
• YeOII bilan hamkorlikning O‘zbekistoning boshqa xalqaro tashkilotlar, xorijiy mamlakatlar bilan hamkorligiga ta’siri.

Yig‘ilishda “Adolat” SDP fraksiyasi maxsus ishchi guruhining dastlabki xulosalari tinglandi. Deputatlar YeOIIga a’zo bo‘lish O‘zbekiston iqtisodiga nima berishiga e’tibor qaratdi:

• birinchidan, a’zolik YeOII davlatlaridagi migrantlar masalasida ayrim ijobiy natijalarni keltirib chiqaradi (2,5 milliondan ortiq O‘zbekiston fuqarosi migrant sifatida mehnat qilmoqda). Ular ishlash va yashash hujjati bilan bog‘liq turli to‘lovlar uchun chet davlatlar hisobiga milliardlab dollar atrofida mablag‘ sarflamoqda. A’zolikdan so‘ng fuqarolar ushbu davlatlarda patent olmasdan ishlash imkoniyatiga ega bo‘ladi va pul jo‘natmalari hozirgi 4-5 milliarddan 7-8 milliard AQSh dollariga yetishi kutilmoqda;
• ikkinchidan, a’zo davlatlar bilan energetika sohasidagi hamkorlik yaxshi natija beradi, chunki ular gaz qazib olish va uni qayta ishlashda dunyoda yetakchi hisoblanadi;
• uchinchidan, turizm sohasida ham katta imkoniyatlar ochiladi. Xalqaro yuk hamda yo‘lovchi tashuvlari soddalashtiriladi;
• to‘rtinchidan, O‘zbekistonning tashqi savdo aylanmasi ortadi. Katta bozorga chiqish va o‘zining mahsulotlarini eksport qilish orqali ayrim tadbirkorlarimiz faoliyati yanada kengayadi.

Deputatlar a’zolik quyidagi salbiy oqibatlarga olib kelishi mumkinligini ta’kidlashdi:

• birinchidan, YeOIIga a’zo bo‘lish natijasida mamlakat sanoati (avtomobilsozlik, oziq-ovqat, farmatsevtika va boshqa) 2 milliard AQSh dollari atrofida yo‘qotishga uchraydi;
• ikkinchidan, YeOII davlatlari tashqi savdo siyosatini yetarlicha mustaqil muvofiqlashtirish imkoniyatiga ega emas;
• uchinchidan, deputatlar tomonidan Yevrosiyo iqtisodiy ittifoqi oldindan belgilangan qoidalar orqali boshqariladigan va nizolar kelishilgan qoidalarga ko‘ra hal eta oladigan tashkilotga hali aylanib ulugurmaganligi tanqidiy baholandi (tahlillarga ko‘ra davlatlarning muhim manfaatlari to‘qnash kelganda ittifoq qoidalarini bir tomonlama buzilishi kuzatilmoqda);
• to‘rtinchidan, YeOIIning eng asosiy a’zosi (ittifoq iqtisodiy potensialining salkam 85 foiz tashkil etuvchi) Rossiya hozirgi kunda xalqaro sanksiyalar va bosim ostida. Bu uning iqtisodiyotiga salbiy ta’sir ko‘rsatmoqda, oxirgi 2 yilda rubl bir necha baravar qadrsizlangan. Ushbu mamlakat bilan bitta ittifoq doirasida hamkorlikka kirishish kelgusida bizning iqtisodiyotimizga ham salbiy ta’sirini o‘tkazadi.

Fraksiya yig‘ilishida deputatlar YeOIIga O‘zbekistonni a’zo bo‘lib kirishi natijasida vujudga keluvchi oqibatlarning dastlabki sarhisobiga tayangan holda hozircha faqat kuzatuvchi davlat sifatida kirishini maqulladi. Shuningdek, parlamentning ishchi guruhi doirasida keng qamrovli tahlillar olib borish orqali ma’sul mutaxassislar bilan muhokamalar o‘tkazish, ularni muntazam ravishda ommaviy axborot vositalarida keng yoritilishini tashkil etishga kelishib olindi.Avvalroq O‘zbekiston parlamenti Yevrosiyo iqtisodiy ittifoqi bilan hamkorlik masalasini o‘rganishga kirishgani haqida xabar berilgan edi. Mart oyining boshlarida esa O‘zbekiston YeOIIga kuzatuvchi-davlat maqomida qo‘shilishi ma’lum bo‘lgandi. Oliy Majlis deputati YeOIIga a’zo bo‘lish tarafdorlari taqdim qilgan chalg‘ituvchi raqamlardan ehtiyot bo‘lishga chaqirgan.