Loyihamiz qahramoni — Rajabova Surayyo To‘laganovna, umumiy amaliyot shifokori. Rajabova Surayyo To‘laganovna 40 yildan buyon shifokor bo‘lib ishlab kelmoqda. Ayni paytda Yakkasaroy tumanidagi 57-sonli poliklinikada umumiy amaliyot shifokori bo‘lib ishlaydi.
COVID-19 bilan bog‘liq vaziyat tufayli ko‘p sonli uyga chaqiruvlar va klinikadagi qabullarga qaramay, Surayyo To‘laganovna o‘zining nekbin kayfiyatini yo‘qotmagan.
“Ha, biz ayni vaqtda xatarli hududda ishlayapmiz va hozirda bizda umumiy amaliyot vrachlari yetishmayapti, 12 ta bo‘limda 4 nafar shifokor ishlamoqda. Ammo, shunga qaramay, biz ma’muriyat tomonidan ko‘rsatilayotgan katta yordamni his qilmoqdamiz, biz uchun ham, bemorlar uchun ham barcha sharoitlar yaratilgan”.
Hozirgi vaziyatda o‘z faoliyatlarida yuzaga kelayotgan qiyinchiliklar masalasida esa, Surayyo To‘laganovna ish hajmining ko‘pligiga qaramay, xotirjamlikni saqlab qolish va sabr-toqatli bo‘lish, tushkunlikka tushmaslik kerak, — deb hisoblaydi.
“Odamlarga xavfsizlik choralarini, shaxsiy gigiyena qoidalarini va viruslardan himoyalanish qoidalarini shoshilmasdan va aniq qilib, ammo ularni vahima va xavotirga solmasdan tushuntirish kerak. Biz mutlaqo xilma-xil odamlar bilan ishlaymiz, ular – homilador ayollar, bolalar, qariyalar. Va ularning har biri bilan ishlashning o‘z yondashuvi bor. Biz bemorga qulay bo‘lgan tilda tushuntirishga harakat qilamiz. Agar bir necha marta takrorlash kerak bo‘lsa, takrorlaymiz. Bemor hamma narsani eslab qolishi biz uchun juda muhim”.
“Ba’zida uxlash va dam olish uchun atigi 2 soat vaqtimiz bo‘ladi, ammo bemorlarimizning minnatdorchilik so‘zlarini eshitganimizda barcha charchoqlarimiz o‘z-o‘zidan tarqaladi, chunki biz shifokorlar uchun bundan qadrliroq narsa yo‘q”.
Siz hayotingizni shifokorlik kasbisiz tasavvur qila olasizmi?
“Yo‘q, albatta, yo‘q, men o‘z hayotimni kasbimsiz tasavvur qila olmayman.Men har safar uxlashga yotganimda, kun davomida nimalar qilishga ulgura olmaganim va yana nima qilishim kerakligi haqida o‘ylayman. Kimga qo‘ng‘iroq qilish va o‘zini qanday his qilayotganini so‘rash kerakligi, yana kimning yordamga ehtiyoji borligi haqida o‘ylayman. Bu savollarning barchasi uyquga yotishdan oldin birma-bir hayolimda aylanadi.
Mening zimmamda katta mas’uliyat bor. Ba’zan odamlarga shunchaki tibbiy yordamning o‘zi kamlik qiladi, ular shuningdek, psixologik yordamga ham ehtiyoj sezadilar. Ular o‘zlariga yordamga keladigan odamlar borligiga, ularni tashlab qo‘ymasliklariga ishonishlari kerak”.
Dam olish kunlari ham, ta’til kunlari ham o‘zingizni fidokorlarcha ishga bag‘ishlashingizga, oila a’zolaringiz qanday munosabat bildirishadi?
“Albatta, bolalarim men uchun xavotirlanishadi va meni xotirjam nafaqaga chiqishimni xohlashadi. Biroq, agar men xalqimizga foydam tegishi mumkinligini bilar ekanman, ayniqsa hozir, mening bilimim va tajribam zarur bo‘lgan vaqtda qanday qilib uyda o‘tirishim mumkin.Agar siz o‘z ishingizni sevsangiz, qiyinchiliklar va charchoq haqida mutlaqo o‘ylamaysiz. Asosiysi – hamma sog‘-salomat bo‘lsin”.
Shuningdek, Surayyo To‘laganovna bolalar albatta ota-onalarining izidan yurishlari kerak deb hisoblamaydi. Chunki, ishingizdagi muvaffaqiyatingiz sizning o‘z kasbingizni qanchalik sevishingizga bog‘liq.
Siz insonni ko‘ngli tortmagan tomonga yurishga majbur qila olmaysiz. Kasbni har doim hisob-kitobga ko‘ra emas, birinchi navbatda ko‘ngilga qarab tanlash kerak.
Surayyo To‘laganovna bemorlarni qabul qilishni davom ettirishi kerakligi sababli biz suhbatimizni shu nuqtada tugatishga majbur bo‘ldik.
“Bizning kasbimizga qiziqish bildirganingiz uchun tashakkur. “Mehnatsevar” loyihasiga ham alohida rahmat. Biroq men o‘z ishimni davom ettirishim kerak. Barcha o‘quvchilarga va loyiha ishtirokchilariga sihat-salomatlik tilayman”.
Reklama huquqi asosida.
Izoh (0)