Koronavirus pandemiyasi tufayli e’lon qilingan karantin sharoitida Davlat soliq qo‘mitasi (DSQ) tomonidan bozorlar va dorixonalardagi narxlar qat’iy nazoratga olingan, deyiladi qo‘mita matbuot xizmatining xabarida.
Fuqarolar mahsulotlar narxining asossiz o‘sishiga duch kelgan paytda DSQning ishonch telefoniga (71) 244-98-98 yoki 1198 raqamiga qo‘ng‘iroq qilib murojaat qoldirishi mumkin.
DSQ matbuot xizmati xabariga ko‘ra, 18-mart holati bo‘yicha qo‘mitaga jami 1635 ta murojaat kelib tushgan. Odamlar, asosan, kartoshka (497), un (306) va o‘simlik yog‘i (63) narxlarining oshganidan shikoyat qilmoqda. Eng ko‘p murojaat 17-mart kuni kelib tushgan bo‘lib, shu kuni jami 1112 ta shikoyat ro‘yxatga olingan.
Shikoyatlarning katta qismi tibbiy niqoblarning yuqori narxlari bilan bog‘liq. Davlat soliq qo‘mitasiga niqoblar narxlarining keskin oshirilgani borasida 240 ta talabnoma kelib tushgan, 46 nafar fuqaro antiseptik vositalar narxlarining ko‘tarilgani haqida shikoyat qilgan.
Eng ko‘p shikoyat Toshkent (288), Samarqand (238) va Andijon (202) viloyatlariga to‘g‘ri kelgan. Xorazm viloyati (12), Qoraqalpog‘iston Respublikasi (16) va Sirdaryo viloyati (17)dan nisbatan kamroq murojaat va shikoyatlar kelib tushgan.
Soliq xizmati xodimlari barcha murojaatlar yuzasidan o‘rganish va tahlil ishlarini tashkil etgan, narxlar ko‘tarilishining oldini olish choralari ko‘rilmoqda, vijdonsiz tadbirkorlarga nisbatan keskin jazo choralari qo‘llaniladi.
Mavzuga doir:
- Buxoroning Olot va Qorako‘l tumanlarida kartoshka 14 ming so‘mgacha oshgani aytilgandi. Tadbirkor esa 5 tonna kartoshka xarid qilib, aholiga 3,5 ming so‘mdan sotdi
- Toshkentda bir kunda qiymati 123 mln so‘mlik sifatsiz tibbiy niqobning noqonuniy ravishda savdoga qo‘yilgani aniqlandi
- O‘zbekistonga kirib kelgan koronavirus, #vahimasizkarantin va hazillashishga doim sabab topadigan memchilar. Ijtimoiy tarmoqlardagi muhokamalar sharhi
Izoh (0)