Toshkentdagi “Chorsu” bozorida notanish erkak ovozini qattiq ko‘tarib, “hammang yolg‘on, televizor uchun qilyapsan”, deb odamlarni atrofiga yig‘di. Bu haqda Davlat soliq qo‘mitasi raisi o‘rinbosari Abdulla Azizov o‘zining Facebook’dagi sahifasida yozib qoldirdi.

Foto: Facebook/Abdulla Azizov

Ma’lum bo‘lishicha, muammo sarimsoq piyoz narxi qimmatlashganidan boshlangan. To‘plangan odamlardan biri xaridor ayolning qo‘lidagi sarimsoqqa ishora qilib, uning qimmatlashganini aytgan. “Okaxonni oldiga borib gapirsam, man sani eshitmayman, san mani eshit — munosabat qildi”, — deydi Abdulla Azizov.

Muammoni oxirigacha o‘rganish maqsadida narx qayerda oshirilganini so‘raganida sarimsoq ko‘tarib turgan ayol voqea joyidan ketib qolgan. Ayolning qo‘lidagi sarimsoqlarni ko‘rsatgan erkak esa Abdulla Azizovdan 500 dollar pul so‘ragan. DSQ raisi o‘rinbosarining aytishicha, bir kun avval ham xuddi shunday vaziyat bo‘lgan, boshqa bozorlarda bu holat kuzatilmagan.

Foto: Facebook/Abdulla Azizov

Shuningdek, uning ta’kidlashicha, sarimsoqdan boshqa mahsulotga narx oshmagan. Sotuvchilar uning narxi kilosi 40 ming so‘m, donasi 2 000 so‘mdan ekanini aytgan. Biroq kelishiga yaqin yashirishga harakat qilganini sezib qolgan. Demak narx 40 ming so‘m emas, ekan deb xulosaga kelgan.

Go‘shtning bozorga kirish narxi kechagidan 2 000 so‘mga pasaygan, lekin sotuv narxda katta o‘zgarish yo‘q, ya’ni eski narx. Un, yog‘, shakar, kartoshka, piyoz narxida o‘zgarish sezilmagan. Odamlar soni ko‘p emas, talab biroz pasaygan.

Abdulla Azizovning “Daryo”ga qo‘shimcha qilishicha, odamlar bozorning qaysi “tochkalari”da narxlar borasida o‘yin bo‘layotganini aytsa, nazorat qilayotgan xodimlarga katta yordam bergan bo‘ladi. Uning aytishicha, o‘zi borib o‘rgangan “Chorsu” hamda “Askiya” dehqon bozorlarida ayrim xaridorlar mas’ullarni ko‘rgan zahoti narx nazorati borasida qilinayotgan ishlarni qo‘llab-quvvatlab, bundan mamnun ekanligini bildirgan. Norozilik jihatlari bo‘lsa aytib, vaziyatga to‘la tushunish bilan yondashgan.

Foto: Facebook/Abdulla Azizov

Shu bilan birga, shoshib turgan, bozor aylanishga vaqti yo‘q, narxlar ko‘tarilib ketayotgani haqida vahima qilayotgan xaridorlar ayrim sotuvchilarning qaramog‘iga tushib qolishi holatlari bo‘layotganidan ham ogohlantirdi. Sotuvchilarning ayrimlari narxlarni xaridorlarning holati, ko‘rinishi, vaziyatidan kelib chiqib, belgilayotgan vaziyatlar borligi, bu haqda xabar topilishi bilan chora ko‘rilayotganini ta’kidladi. Narxlarni o‘yin qilayotgan sotuvchilarni aniqlashda barcha xaridorlarni ogoh bo‘lishga chaqirdi.

Avvalroq Davlat soliq qo‘mitasi raisi oziq-ovqat mahsulotlari narxi nazoratga olinishini ma’lum qilgandi. Tadbirkorlardan esa koronavirus karantini sharoitida narxlarni oshirmaslik haqida kafolat xati olinmoqda.