Коронавирус пандемияси туфайли эълон қилинган карантин шароитида Давлат солиқ қўмитаси (ДСҚ) томонидан бозорлар ва дорихоналардаги нархлар қатъий назоратга олинган, дейилади қўмита матбуот хизматининг хабарида.
Фуқаролар маҳсулотлар нархининг асоссиз ўсишига дуч келган пайтда ДСҚнинг ишонч телефонига (71) 244-98-98 ёки 1198 рақамига қўнғироқ қилиб мурожаат қолдириши мумкин.
ДСҚ матбуот хизмати хабарига кўра, 18 март ҳолати бўйича қўмитага жами 1635 та мурожаат келиб тушган. Одамлар, асосан, картошка (497), ун (306) ва ўсимлик ёғи (63) нархларининг ошганидан шикоят қилмоқда. Энг кўп мурожаат 17 март куни келиб тушган бўлиб, шу куни жами 1112 та шикоят рўйхатга олинган.
Шикоятларнинг катта қисми тиббий ниқобларнинг юқори нархлари билан боғлиқ. Давлат солиқ қўмитасига ниқоблар нархларининг кескин оширилгани борасида 240 та талабнома келиб тушган, 46 нафар фуқаро антисептик воситалар нархларининг кўтарилгани ҳақида шикоят қилган.
Энг кўп шикоят Тошкент (288), Самарқанд (238) ва Андижон (202) вилоятларига тўғри келган. Хоразм вилояти (12), Қорақалпоғистон Республикаси (16) ва Сирдарё вилояти (17)дан нисбатан камроқ мурожаат ва шикоятлар келиб тушган.
Солиқ хизмати ходимлари барча мурожаатлар юзасидан ўрганиш ва таҳлил ишларини ташкил этган, нархлар кўтарилишининг олдини олиш чоралари кўрилмоқда, виждонсиз тадбиркорларга нисбатан кескин жазо чоралари қўлланилади.
Мавзуга доир:
- Бухоронинг Олот ва Қоракўл туманларида картошка 14 минг сўмгача ошгани айтилганди. Тадбиркор эса 5 тонна картошка харид қилиб, аҳолига 3,5 минг сўмдан сотди
- Тошкентда бир кунда қиймати 123 млн сўмлик сифатсиз тиббий ниқобнинг ноқонуний равишда савдога қўйилгани аниқланди
- Ўзбекистонга кириб келган коронавирус, #vahimasizkarantin ва ҳазиллашишга доим сабаб топадиган мемчилар. Ижтимоий тармоқлардаги муҳокамалар шарҳи
Изоҳ (0)