Rossiya Federatsiyasi hukumati COVID-19 pandemiyasi tufayli xorijliklar uchun mamlakat hududiga kirishni cheklab, o‘z chegaralarini yopishga qaror qildi. Bu haqda Rossiya hukumatining rasmiy saytida xabar qilingan.
Xabarga ko‘ra, boshqa davlatlar fuqarolari uchun Rossiya hududiga kirish 18-martdan 1-mayga qadar yopiq bo‘ladi. Bu haqda Rossiya bosh vaziri Mixail Mishustin Belarus, Ozarbayjon, Armaniston, Qozog‘iston, Qirg‘iziston, Tojikiston bosh vazirlari, shuningdek, O‘zbekiston bosh vaziri Abdulla Aripov bilan telefon muloqotlarida kelishib olgan.
Cheklovlar diplomatlar, samolyotlar ekipajlarining a’zolari, kema va poyezdlarda ishlovchi insonlar, shuningdek, tranzit aviayo‘lovchilar va Rossiyada yashash ruxsatnomasiga ega xorijliklarga taalluqli emas. Jismoniy shaxslar Rossiyaga faqat yaqin qarindoshlarining vafoti munosabati bilan marakalarda ishtirok etish uchun kelishi mumkin.
16-martdan Kanada hamda Malayziya davlatlari ham chegaralari yopilganini e’lon qilgan. Yevroittifoq rahbariyati xuddi shunday qarorlar unga a’zo davlatlar hududida, shuningdek, Shengen zonasida ham qo‘llanishi mumkinligini ma’lum qilgan.
Avval “Aeroflot” kompaniyasi O‘zbekistonga parvozlarni to‘xtatgani, O‘zbekiston ham koronavirus sabab avia va avtoqatnovlarni to‘xtatgani, chet elda qolgan vatandoshlar charter reyslarida qaytarilishi haqida xabarlar berilgan. Rossiyada 13-mart, juma kuni, italiyaliklar va Apenin yarimorolidan kelgan boshqa xorijliklarga mamlakat hududiga kirish vaqtincha taqiqlangan.
Izoh (0)