O‘zbekistonda kuniga 500 ming dona tibbiy niqob ishlab chiqarilmoqda, ularning sonini 2 milliontaga yetkazish mumkin

O‘zbekistonda bir kunda 500 ming dona tibbiy niqob ishlab chiqarilmoqda. Mamlakatdagi ishlab chiqarish quvvatlari bir kunda tayyorlanadigan niqoblar sonini ikki million donagacha yetkazish imkonini beradi. Bu haqda “O‘zto‘qimachiliksanoat” assotsiatsiyasi xabar berdi.

Ma’lum qilinishicha, 2020-yilning yanvar-mart oylarida o‘nlab tadbirkorlar 3 ta asosiy turdagi tibbiyot niqoblari ishlab chiqarish hajmini oshirgan.

• Bir marta ishlatiladigan uch qavatli tibbiy niqoblar. Ular maxsus dastgohlarda sintetik material — spanbonddan tayyorlangan hamda filtr qatlami va ikkita tashqi qatlamdan iborat;
• Bir marta ishlatiladigan uch qavatli spandbonddan tayyorlangan tibbiy niqob. Ular tikuv dastgohlarida tikiladi. Bugungi kunda ishlab chiqarish yangi mahsulot turi sifatida respublika hududlarida tikuvchilik korxonalari (ustaxonalar)da tayyorlanmoqda;
• Dokadan tikilgan 3-4 qavatli tibbiyot niqoblari. Ular to‘liq mahalliy xomashyolardan tayyorlanadi. Ishlab chiqarish deyarli barcha tikuv ustaxonalari, shu jumladan, xonadonlarda tashkil etilgan.

O‘tkazilgan monitoringga ko‘ra, mart oyi boshida yalpi ishlab chiqarish quvvati kuniga 500 ming donani tashkil qilmoqda. Shu bilan birga ushbu quvvatni kuniga bir million va ikki milliongacha yetkazish mumkin.Eslatib o‘tamiz, O‘zbekistonda koronavirus yuqtirib olganlar soni sakkiz nafarga yetdi. 15-mart, yakshanba kuni, bir muddat avval Fransiyada bo‘lib qaytgan o‘zbekistonlik ayolda koronavirus aniqlangani haqida xabar berilgan edi. Keyinchalik uning o‘g‘li, qizi, turmush o‘rtog‘i va nevarasida ham virus aniqlangani ma’lum qilingan edi.

Olib borilgan tahlil natijalariga ko‘ra, Sog‘liqni saqlash vazirligidan ma’lum qilishlaricha, ushbu bemor bilan muloqotda bo‘lgan qarindoshida ham koronavirus qayd etilgan.

Bundan tashqari, 14-mart kuni Uzbekistan Airways’ning London—Toshkent reysida kelgan O‘zbekiston fuqarosida ham koronavirus aniqlangan. 15-mart kuni soat 05:15 da Uzbekistan Airways’ning Istanbul—Toshkent reysida kelgan O‘zbekiston fuqarosida ham koronavirus qayd etilgan. Koronavirusga chalingan olti bemorning ahvoli hozircha qoniqarli ekani ma’lum qilindi.