Xalq ta’limi vazirligi o‘qituvchilar ishtirokida majlislar o‘tkazish bo‘yicha topshiriq berilmaganini ma’lum qildi

O‘zbekiston Xalq ta’limi vazirligining ma’lum qilishicha, ba’zi viloyatlardagi maktablarda o‘qituvchilar ishtirokida, jumladan, mahalliy hokimiyat vakillari talablariga ko‘ra turli majlislar o‘tkazilayotganligi haqida ma’lumotlar kelib tushmoqda.

Vazirlikning qayd etishicha, O‘zbekiston bosh vaziri Abdulla Aripov boshchiligidagi koronavirus infeksiyasi tarqalishining oldini olish va ta’lim muassasalarida sanitariya-epidemiologik osoyishtalikni ta’minlash yuzasidan respublika maxsus komissiyasi tomonidan tashkilotlar tashabbusi bilan tashkil etiladigan tadbirlar, majlislar va yig‘ilishlarga cheklovlar kiritilgan.

Shu bilan birga, Xalq ta’limi vazirligi mahalliy hokimiyat vakillaridan o‘qituvchilarni xizmat majburiyati bilan bog‘liq bo‘lmagan ishlarga jalb qilmaslikni talab qilmoqda.

Vazirlikning ta’kidlashicha, Prezidentning 2018-yil 14-avgustdagi “Yoshlarni ma’naviy-axloqiy va jismoniy barkamol etib tarbiyalash, ularga ta’lim-tarbiya berish tizimini sifat jihatidan yangi bosqichga ko‘tarish chora-tadbirlari to‘g‘risida”ga qaroriga muvofiq, xalq ta’limi xodimlarini xizmat majburiyati bilan bog‘liq bo‘lmagan ishlarga, majburiy mehnatga, shu jumladan, tuman va shaharlar hududlarini obodonlashtirish hamda ko‘kalamzorlashtirish, mavsumiy qishloq xo‘jaligi hamda boshqa turdagi ishlarga jalb qilish taqiqlanadi.