Qozog‘istonning Chimkent shahridagi eski fosfor zavodi hududida joylashgan konteynerda besh nafar O‘zbekiston fuqarosi is gazidan zaharlandi. Bu haqda Kazinform xabar berdi.
Ma’lum qilinishicha, mazkur konteyner yashash joyi sifatida jihozlangan, unga isitish qurilmalari o‘rnatilmagan, gaz o‘tkazilmagan. O‘zbekiston fuqarosi bo‘lgan besh nafar ishchi xonani isitish uchun u yerga chiqindi qutisini o‘rnatgan hamda uning ichida olov yoqqan. Olov yonishi natijasida ajralib chiqqan is gazidan zaharlanib, ularning to‘rt nafari vafot etgan, yana bir nafar fuqaro og‘ir ahvolda kasalxonaga yotqizilgan.
Voqea joyiga Qozog‘iston favqulodda vaziyatlar, yong‘in xavfsizligi va ichki ishlar idoralari xodimlari yetib borgan.
Avvalroq Sirdaryo va Farg‘onada is gazidan zaharlanish oqibatida to‘rt kishi vafot etgan edi. Shuningdek, Rossiyadagi konda sodir bo‘lgan yong‘in oqibatida 3 nafar o‘zbekistonlik halok bo‘lgan edi.
Izoh (0)