Ўзбекистонда кунига 500 минг дона тиббий ниқоб ишлаб чиқарилмоқда, уларнинг сонини 2 миллионтага етказиш мумкин

Ўзбекистонда бир кунда 500 минг дона тиббий ниқоб ишлаб чиқарилмоқда. Мамлакатдаги ишлаб чиқариш қувватлари бир кунда тайёрланадиган ниқоблар сонини икки миллион донагача етказиш имконини беради. Бу ҳақда «Ўзтўқимачиликсаноат» ассоциацияси хабар берди.

Маълум қилинишича, 2020 йилнинг январь-март ойларида ўнлаб тадбиркорлар 3 та асосий турдаги тиббиёт ниқоблари ишлаб чиқариш ҳажмини оширган.

• Бир марта ишлатиладиган уч қаватли тиббий ниқоблар. Улар махсус дастгоҳларда синтетик материал — спанбонддан тайёрланган ҳамда фильтр қатлами ва иккита ташқи қатламдан иборат;
• Бир марта ишлатиладиган уч қаватли спандбонддан тайёрланган тиббий ниқоб. Улар тикув дастгоҳларида тикилади. Бугунги кунда ишлаб чиқариш янги маҳсулот тури сифатида республика ҳудудларида тикувчилик корхоналари (устахоналар)да тайёрланмоқда;
• Докадан тикилган 3-4 қаватли тиббиёт ниқоблари. Улар тўлиқ маҳаллий хом ашёлардан тайёрланади. Ишлаб чиқариш деярли барча тикув устахоналари, шу жумладан, хонадонларда ташкил этилган.

Ўтказилган мониторингга кўра, март ойи бошида ялпи ишлаб чиқариш қуввати кунига 500 минг донани ташкил қилмоқда. Шу билан бирга ушбу қувватни кунига бир миллион ва икки миллионгача етказиш мумкин.Эслатиб ўтамиз, Ўзбекистонда коронавирус юқтириб олганлар сони саккиз нафарга етди. 15 март, якшанба куни, бир муддат аввал Францияда бўлиб қайтган ўзбекистонлик аёлда коронавирус аниқлангани ҳақида хабар берилган эди. Кейинчалик унинг ўғли, қизи, турмуш ўртоғи ва неварасида ҳам вирус аниқлангани маълум қилинган эди.

Олиб борилган таҳлил натижаларига кўра, Соғлиқни сақлаш вазирлигидан маълум қилишларича, ушбу бемор билан мулоқотда бўлган қариндошида ҳам коронавирус қайд этилган.

Бундан ташқари, 14 март куни Uzbekistan Airways’нинг Лондон—Тошкент рейсида келган Ўзбекистон фуқаросида ҳам коронавирус аниқланган. 15 март куни соат 05:15 да Uzbekistan Airways’нинг Истанбул—Тошкент рейсида келган Ўзбекистон фуқаросида ҳам коронавирус қайд этилган. Коронавирусга чалинган олти беморнинг аҳволи ҳозирча қониқарли экани маълум қилинди.