Toshkent shahridagi Yashnobod va Mirzo Ulug‘bek tumanlari, Maxtumquli, Temur Malik, Parkent va Ohangaron ko‘chalari tutashmasida qurilayotgan uch qavatli ko‘prikning qurilish ishlari yaqin vaqt ichida yakunlash rejalashtirilgan.
Ikki tumanni bir-biriga bog‘laydigan va shu hududdagi tirbandliklarni bartaraf etish uchun qurilayotgan ko‘prik va tunnelning umumiy loyiha qiymati 140 milliard so‘mni tashkil etadi. Uning doirasida bitta tunnel, ikkita yo‘l o‘tkazgich, bitta halqasimon yo‘l va bitta ko‘prik qurildi. Ayni paytda bu yerda so‘nggi pardozlash, asfaltlash, trotuar plitalarini yotqizish hamda atrofni obodonlashtirish ishlarining yakuniy bosqichi nihoyasiga yetmoqda.
Hududda umumiy miqdori 61 ming kvadrat metr asfalt, 14,5 ming metr trotuar yo‘laklari yotqizish, 19,5 ming kvadrat metr obodonlashtirish ishlari olib borildi, 180 dona yangi yoritgich qo‘yilgan. Ayni paytda 1600 nafar muhandis va ishchi xodimlar ishlamoqda. Jarayonni jadallashtirish va yengillashtirish uchun 260 dan ortiq texnika jalb qilingan.
Uch qavatli ko‘prikning birinchi qismida Parkent—Ohangaron shohko‘chasi yo‘nalishidagi 502 metrli tunnelni ko‘rish mumkin.
Ikkinchi qavatda doirasimon yo‘l o‘tkazgich joy olgan.
Uchinchi qavatda Maxtumquli ko‘chasidan Toshkent viloyatiga chiqib ketuvchi yo‘l o‘tgan bo‘lib, uning uzunligi 593 metrni tashkil etadi.
2018-yilning may oyida qurilishi boshlanib, o‘sha yilning iyun oyida O‘zbekiston Prezidenti Shavkat Mirziyoyevga taqdim etilgan mazkur loyiha avvaliga 2019-yil avgustigacha, keyin esa yil oxirigacha qurib bitkazilishi rejalashtirilgan edi.
“Daryo” muxbiri 17-mart kuni ochilishi belgilangan ko‘prik hududida bo‘lib, fotoreportaj tayyorladi.
Izoh (0)