Buxoroda 7 ta viloyat aholisiga xizmat ko‘rsatadigan shifoxonaga olib boruvchi yo‘l ustidagi noqonuniy kiyim bozori ko‘chirildi. Ammo eski kiyim-kechak sotuvchilari uchun joy masalasi muammo bo‘lmoqda.
Mazkur holatni o‘rgangan “Daryo” muxbiri Laylo Hayitovaning yozishicha, shu paytga qadar tez yordam mashinasi haydovchilari eski kiyim sotuvchilari yo‘lni egallab olgani bois katta yo‘l boshidan shifoxonagacha bo‘lgan 2-3 daqiqalik yo‘lga 15 daqiqadan ko‘proq vaqt sarflashga majbur bo‘lgan.
Mazkur shifoxonaga olib boruvchi yo‘l sotuvchilar tomonidan to‘sib qo‘yilganiga bir yildan oshgan. Haftaning payshanba va yakshanba kunlari mazkur yo‘lda eskifurushlar bozori “qaynaydi”. Bu holatga bir yildan buyon na ichki ishlar idorasi, na Buxoro shahar hokimligi e’tibor qaratgan.
“Bemorlarni ko‘rib, ehtiyoj ko‘payib borayotganini anglash qiyin emas. Olis masofani bosib, har safar bemor yaqinlarimni yo‘qlab kelaman. Ammo yo‘lning sotuvchilar tomonidan to‘sib qo‘yilgani kirib-chiqishga noqulaylik tug‘diryapti”, — deydi qoraqalpog‘istonlik Ulbosin Erkinbayeva.
Ta’kidlanishicha, Respublika ixtisoslashtirilgan onkologiya va radiologiya ilmiy-amaliy tibbiyot markazi Surxondaryo, Qashqadaryo, Navoiy, Buxoro, Xorazm, Samarqand viloyatlari hamda Qoraqalpog‘iston Respublikasi aholisiga xizmat ko‘rsatadi.
Shifoxona yo‘lidan sal narida “Karvon” savdo kompleksi mavjud bo‘lib, bozorning umumiy yer maydoni 9,48 gektarni tashkil etadi. 247 ta savdo do‘koni 527 ta savdo pavilyoni va 224 ta savdo rastasi mavjud bozorda 1000 ga yaqin sotuvchi faoliyat yuritadi.
“Karvon” savdo kompleksi rahbari Shohrux Qodirovning “Daryo” muxbiriga ma’lum qilishicha, eski kiyim-kechak sotuvchilar uchun bozordan bir va uch gektarli ikkita alohida maydon ajratilgan. Shunga qaramasdan, sotuvchilar eski kiyimlarni aynan shifoxona yo‘li ustida sotuvga chiqaradi. Bozor ma’muriyati, ichki ishlar organlari, soliq inspeksiyasi vakillarining ogohlantirishiga qaramay, sa’y-harakatlar natijasiz qolavergan.
“Nima qilaylik, biz shifoxona yo‘liga chiqib savdo qilishga majburmiz. Bozor hududidan eskifurushlar uchun ajratilgan maydonning ahvolini borib ko‘ring. ‘Bu yerda savdo qilma, tur, belgilangan joyda savdo qil’, deyish oson. Biz ham oilamizga ikki-uch so‘m olib kiraylik, deb shu joylarga kelib savdo qilyapmiz”, — deydi sotuvchilar.
“Karvon” savdo kompleksi rahbari yordamchisi Aziz Ibodovga ko‘ra, avval eski kiyim sotuvchilar uchun Buxoro markaziy dehqon bozoridan 700 ta joy ajratilgan. Hozirgi kunda esa ularning soni 2000 nafardan oshib ketgan.
Kuzatuvlarimizga ko‘ra, bozor hududida sotuvchilar uchun ajratilgan ikki maydon ham achinarli ahvolda. Tosh va axlat uyumlariga to‘la. Balchiqning badbo‘y hidi dimog‘ni bo‘g‘adi. Shunga qaramasdan, sotuvchilar hatto bozor axlatxonasini ham egallab olgan. Eskifurushlar bozori antisanitar holatda.
“Aslida, bu sotuvchilar uchun bitta maydon ajratilgan, yetmagach esa noqonuniy tarzda ikkinchi maydonni ham ajratishga to‘g‘ri kelgan. Biroq eski kiyim-kechak sotuvchilaridan joy haqi olinmasligiga sabab bu ikki maydonni ta’mirlash uchun mablag‘ yo‘q”, — deydi Aziz Ibodov.
Aniqlanishicha, 5-6 oydan buyon bozorga sanitariya inspeksiyasi vakillari kelmagan.
Buxoro shahar sanitariya inspeksiyasi xodimi Subhon Jo‘rayevga ko‘ra, tashkilotning agentlik va Vazirlar Mahkamasi huzuridagi sanitariya epidemiologiya bosh inspeksiyasi sifatida ish boshlashi inspeksiya xodimidan barcha huquqlarni olgan. Shu sabab xodimning hech bir ishga aralashishiga yo‘l qo‘yilmayapti.
“Organ va bozor ma’muriyatining mening ustimdan ‘protokol’ qilishga nima haqi bor? G‘ijduvon dehqon bozori yo‘lidan quvib solishgandan keyin shu yerga kelishga majburman. Sotuvimdagi mahsulotlardan davlatga ortiqcha ‘patent’ to‘lashni istamayman. O‘zi nogiron bo‘lsam, pul topish uchun fohishalik qilishim kerakmi endi? — deydi yakka tartibdagi tadbirkorlardan biri.
“Eski kiyim-kechak sotuvchilari uchun mo‘ljallangan bozor, aslida, Buxoro markaziy dehqon bozori hududida joylashgan bo‘lib, har bir sotuvchining ismi-sharifi ro‘yxatga olingan edi. Hozir sotuvchilar soni ikki barobarga oshdi. Shunga qaramasdan, shahar hokimligi, huquq-tartibot idoralari, soliq inspeksiyasi, bozor ma’muriyati hamkorligida eski kiyim sotuvchilar bozorini tartibga keltirish, ularni Respublika ixtisoslashtirilgan onkologiya va radiologiya ilmiy-amaliy tibbiyot markazi Buxoro filialiga olib boruvchi qariyb 1 kilometr uzunlikdagi qatnov yo‘lidan ko‘chirish chora-tadbirlarini belgilaymiz. Savdo obyektlarida qattiq nazorat tartibi o‘rnatilib, sotuvchilarga ham xaridorlarga ham imkoniyat va qulay sharoitlar yaratiladi, — deydi “Daryo” muxbiri bilan suhbatda Buxoro shahar hokimi o‘rinbosari Baxtiyor Maqsudov.
Jurnalist surishtiruvi jarayonida mas’ullarning tashabbusi bilan Respublika ixtisoslashtirilgan onkologiya va radiologiya ilmiy-amaliy tibbiyot markazi Buxoro filialiga olib boruvchi qatnov yo‘li eskifurushlardan bo‘shatilib, nazorat tartibi o‘rnatildi. Hudud tozalanib, avtomashinalar qatnovidagi tirbandlik va noxush holatlarning oldi olindi. Ammo eski kiyim-kechak sotuvchilari uchun joy masalasi muammoligicha qolmoqda.
“‘Karvon’ savdo kompleksi hududidagi eski kiyim-kechak sotuvchilariga mo‘ljallangan maydon to‘liq ta’mirlanadi. O‘zbekiston Respublikasi Prezidenti raisligida joriy yilning 27 fevralida tadbirkorlikni rivojlantirish orqali kambag‘allikni qisqatirishga qaratilgan chora-tadbirlarning bajarilishi yuzasidan ushbu masala bo‘yicha amaliy ishlar qilinadi. Respublika ixtisoslashtirilgan onkologiya va radiologiya ilmiy-amaliy tibbiyot markazi Buxoro filiali yo‘li ham ta’mirlanadi, — deydi Baxtiyor Maqsudov.
Izoh (0)