Uzbekistan Airways ijtimoiy tarmoqlarda koronavirusning aviatsiya iqtisodiyotiga ta’sir qilishi, aviakompaniya o‘z xodimlarini haq to‘lanmaydigan mehnat ta’tiliga jo‘natishni rejalashtirayotgani, majburiy ta’tilga deyarli barcha xizmat vakillari jo‘natilishi, vaziyat qancha davom etishi noma’lumligi haqida tarqalgan xabarlarga izoh berdi. Bu haqda “Kun.uz” xabar berdi.
“Bu xabar texniklarimizning ichki guruhida tarqalgan, ammo haqiqatga zid. Qizig‘i, boshqa yo‘nalishlardan farqli ravishda aynan shu bo‘lim katta ish hajmiga ega. Sababi texnik xizmatlarimiz eng kamida aprel oyiga qadar buyurtmalarga ega va tinimsiz ishlayapti.
Endi bevosita Uzbekistan Airways’ning faoliyatiga kelsak, chindan ham ko‘plab reyslar bekor qilinayotganidan xabaringiz bor. Bu nafaqat bizda, balki butun dunyoda kuzatilayotgan holat. Lekin shunga qaramay rahbariyat ishdan bo‘shatish, majburiy ta’tilga chiqarishni rejalashtirmagan, aksincha bunday qilmaslik uchun barcha choralarni ko‘rmoqda.
Navro‘z bayrami arafasida ichki reyslarga 50 foizgacha chegirmalar e’lon qildik. Xalqaro reyslar bo‘yicha ham bunday rejalarimiz bor edi, ammo koronavirus tarqalishi bilan bog‘liq vaziyat tufayli keyinga surildi.
Eng muhimi, butun dunyo aviakompaniyalari bugungi kunda murakkab vaziyatda. Uzbekistan Airways vaziyatdan kamroq talafot bilan chiqish yo‘llarini izlamoqda. Xususan, xaridlar qayta ko‘rib chiqilyapti, optimizatsiya usullari qo‘llanyapti.
Albatta, vaziyat kun sayin o‘zgarib bormoqda va buni hisobga olmaslikning iloji yo‘q. Agar sharoit taqozosi bilan qo‘shimcha chora-tadbirlar ko‘rishga majbur bo‘lsak, bu haqda rasman xabar beramiz”, — dedi milliy aviakompaniya matbuot kotibi Habibullo Nabiyev.
Avval Uzbekistan Airways’ning koronavirus sabab xorij fuqarolariga jarima to‘lovisiz chiptalarni qaytarish imkoniyatini berishi, O‘zbekistonning 14-martdan boshlab Fransiya, Italiya va Britaniya bilan aviaqatnovlarni to‘xtatishi xabar qilingan.
Izoh (0)