Бухорода 7 та вилоят аҳолисига хизмат кўрсатадиган шифохонага олиб борувчи йўл устидаги ноқонуний кийим бозори кўчирилди. Аммо эски кийим-кечак сотувчилари учун жой масаласи муаммо бўлмоқда.
Мазкур ҳолатни ўрганган «Дарё» мухбири Лайло Ҳайитованинг ёзишича, шу пайтга қадар тез ёрдам машинаси ҳайдовчилари эски кийим сотувчилари йўлни эгаллаб олгани боис катта йўл бошидан шифохонагача бўлган 2-3 дақиқалик йўлга 15 дақиқадан кўпроқ вақт сарфлашга мажбур бўлган.
Мазкур шифохонага олиб борувчи йўл сотувчилар томонидан тўсиб қўйилганига бир йилдан ошган. Ҳафтанинг пайшанба ва якшанба кунлари мазкур йўлда эскифурушлар бозори «қайнайди». Бу ҳолатга бир йилдан буён на ички ишлар идораси, на Бухоро шаҳар ҳокимлиги эътибор қаратган.
«Беморларни кўриб, эҳтиёж кўпайиб бораётганини англаш қийин эмас. Олис масофани босиб, ҳар сафар бемор яқинларимни йўқлаб келаман. Аммо йўлнинг сотувчилар томонидан тўсиб қўйилгани кириб-чиқишга ноқулайлик туғдиряпти», — дейди қорақалпоғистонлик Улбосин Эркинбаева.
Таъкидланишича, Республика ихтисослаштирилган онкология ва радиология илмий-амалий тиббиёт маркази Сурхондарё, Қашқадарё, Навоий, Бухоро, Хоразм, Самарқанд вилоятлари ҳамда Қорақалпоғистон Республикаси аҳолисига хизмат кўрсатади.
Шифохона йўлидан сал нарида «Карвон» савдо комплекси мавжуд бўлиб, бозорнинг умумий ер майдони 9,48 гектарни ташкил этади. 247 та савдо дўкони 527 та савдо павильони ва 224 та савдо растаси мавжуд бозорда 1000 га яқин сотувчи фаолият юритади.
«Карвон» савдо комплекси раҳбари Шоҳрух Қодировнинг «Дарё» мухбирига маълум қилишича, эски кийим-кечак сотувчилар учун бозордан бир ва уч гектарли иккита алоҳида майдон ажратилган. Шунга қарамасдан, сотувчилар эски кийимларни айнан шифохона йўли устида сотувга чиқаради. Бозор маъмурияти, ички ишлар органлари, солиқ инспекцияси вакилларининг огоҳлантиришига қарамай, саъй-ҳаракатлар натижасиз қолаверган.
«Нима қилайлик, биз шифохона йўлига чиқиб савдо қилишга мажбурмиз. Бозор ҳудудидан эскифурушлар учун ажратилган майдоннинг аҳволини бориб кўринг. ‘Бу ерда савдо қилма, тур, белгиланган жойда савдо қил’, дейиш осон. Биз ҳам оиламизга икки-уч сўм олиб кирайлик, деб шу жойларга келиб савдо қиляпмиз», — дейди сотувчилар.
«Карвон» савдо комплекси раҳбари ёрдамчиси Азиз Ибодовга кўра, аввал эски кийим сотувчилар учун Бухоро марказий деҳқон бозоридан 700 та жой ажратилган. Ҳозирги кунда эса уларнинг сони 2000 нафардан ошиб кетган.
Кузатувларимизга кўра, бозор ҳудудида сотувчилар учун ажратилган икки майдон ҳам ачинарли аҳволда. Тош ва ахлат уюмларига тўла. Балчиқнинг бадбўй ҳиди димоғни бўғади. Шунга қарамасдан, сотувчилар ҳатто бозор ахлатхонасини ҳам эгаллаб олган. Эскифурушлар бозори антисанитар ҳолатда.
«Аслида, бу сотувчилар учун битта майдон ажратилган, етмагач эса ноқонуний тарзда иккинчи майдонни ҳам ажратишга тўғри келган. Бироқ эски кийим-кечак сотувчиларидан жой ҳақи олинмаслигига сабаб бу икки майдонни таъмирлаш учун маблағ йўқ», — дейди Азиз Ибодов.
Аниқланишича, 5-6 ойдан буён бозорга санитария инспекцияси вакиллари келмаган.
Бухоро шаҳар санитария инспекцияси ходими Субҳон Жўраевга кўра, ташкилотнинг агентлик ва Вазирлар Маҳкамаси ҳузуридаги санитария эпидемиология бош инспекцияси сифатида иш бошлаши инспекция ходимидан барча ҳуқуқларни олган. Шу сабаб ходимнинг ҳеч бир ишга аралашишига йўл қўйилмаяпти.
«Орган ва бозор маъмуриятининг менинг устимдан ‘протокол’ қилишга нима ҳақи бор? Ғиждувон деҳқон бозори йўлидан қувиб солишгандан кейин шу ерга келишга мажбурман. Сотувимдаги маҳсулотлардан давлатга ортиқча ‘патент’ тўлашни истамайман. Ўзи ногирон бўлсам, пул топиш учун фоҳишалик қилишим керакми энди? — дейди якка тартибдаги тадбиркорлардан бири.
«Эски кийим-кечак сотувчилари учун мўлжалланган бозор, аслида, Бухоро марказий деҳқон бозори ҳудудида жойлашган бўлиб, ҳар бир сотувчининг исми-шарифи рўйхатга олинган эди. Ҳозир сотувчилар сони икки баробарга ошди. Шунга қарамасдан, шаҳар ҳокимлиги, ҳуқуқ-тартибот идоралари, солиқ инспекцияси, бозор маъмурияти ҳамкорлигида эски кийим сотувчилар бозорини тартибга келтириш, уларни Республика ихтисослаштирилган онкология ва радиология илмий-амалий тиббиёт маркази Бухоро филиалига олиб борувчи қарийб 1 километр узунликдаги қатнов йўлидан кўчириш чора-тадбирларини белгилаймиз. Савдо объектларида қаттиқ назорат тартиби ўрнатилиб, сотувчиларга ҳам харидорларга ҳам имконият ва қулай шароитлар яратилади, — дейди «Дарё» мухбири билан суҳбатда Бухоро шаҳар ҳокими ўринбосари Бахтиёр Мақсудов.
Журналист суриштируви жараёнида масъулларнинг ташаббуси билан Республика ихтисослаштирилган онкология ва радиология илмий-амалий тиббиёт маркази Бухоро филиалига олиб борувчи қатнов йўли эскифурушлардан бўшатилиб, назорат тартиби ўрнатилди. Ҳудуд тозаланиб, автомашиналар қатновидаги тирбандлик ва нохуш ҳолатларнинг олди олинди. Аммо эски кийим-кечак сотувчилари учун жой масаласи муаммолигича қолмоқда.
«‘Карвон’ савдо комплекси ҳудудидаги эски кийим-кечак сотувчиларига мўлжалланган майдон тўлиқ таъмирланади. Ўзбекистон Республикаси Президенти раислигида жорий йилнинг 27 февралида тадбиркорликни ривожлантириш орқали камбағалликни қисқатиришга қаратилган чора-тадбирларнинг бажарилиши юзасидан ушбу масала бўйича амалий ишлар қилинади. Республика ихтисослаштирилган онкология ва радиология илмий-амалий тиббиёт маркази Бухоро филиали йўли ҳам таъмирланади, — дейди Бахтиёр Мақсудов.
Изоҳ (0)